Gratë protestojnë në Stamboll – policia intervenon me gaz lotsjellës

Policia turke hodhi gaz lotsjellës në Stamboll ndaj disa qindra grave të mbledhura që protestonin kundër dhunës ndaj tyre dhe tërheqjes së Turqisë nga një marrëveshje ndërkombëtare që mbron gratë.

Të mbledhurit mbanin një pankartë me mbishkrimin, “Do të luftojmë derisa të marrim atë që duam” dhe i bënë thirrje presidentit, Recep Tayyip Erdogan që ta kthejnë vendin në marrëveshjen ndërkombëtare të njohur si Konventa e Stambollit.

Konventa u miratua nga Këshilli i Evropës në vitin 2011 dhe është një mekanizëm që vendos procedura ligjërisht të detyrueshme për të parandaluar dhunën e natyrës seksiste.

Turqia zyrtarisht u largua nga marrëveshja ndërkombëtare në muajin korrik gjersa autoritetet deklaruan më pas se marrëveshja mund të nxiste homoseksualitetin dhe të rrezikonte familjen tradicionale.

Protesta u përpoq të kalonte nëpër barrikadat e policisë, por kjo e fundit u kundërpërgjigj duke hedhur gaz lotsjellës për të shpërndarë turmën.

Tubimi u mbajt me rastin e Ditës Ndërkombëtare për Eliminimin e Dhunës ndaj Grave.

Rruga Press