Gratë e Maznikut dhe Fugës i bëjnë zbor “Taks Forcës”, zaptojnë Pazarin e Ri sa largohen inspektorët
Me urdhër të Edi Ramës, në mbarë vendin ka nisur një aksion i gjerë për lirimin e hapësirave publike të zaptuara padrejtësisht nga biznese apo individë të ndryshëm.
“S’ka më tokë e xanun. Hiqini vetë ato trarë, mblidhni plaçkat dhe lironi hapësirat e përbashkëta midis pallateve. Do ndërhyjmë me gjoba dhe ndjekje penale,” – paralajmëroi Rama në një video live.
Padyshim që kjo është një nismë e mirë, dhe nëse vërtetë do të kishte qëllim lirimin e hapësirave të zaptuara padrejtësisht duheshe mbështetur. Por duket se nisma ka nisur të dështojë që pa u futur tamam në shina.
Në një denoncim të mbërritur për “JOQ“, tregohet me fakte se si një grup i “Taks Forcës” së Tiranës mësyu ditën e djeshme rreth orës 10:00 në zonën e Pazarit të Ri në Tiranë. Qëllimi për lirimin e hapësirave të zaptuara duket se dështoi!
Menjëherë pasi punonjësit e “Taks Forcës” u larguan, te ky lokal që ndodhet në hyrje të pazarit, punonjësit filluan të mbërthejnë përsëri tendat dhe të nxjerrin jashtë tavolinat, duke u bërë sërish zaptues të hapësirës publike.
Sipas raportimeve për “JOQ“, lokali në fjalë është në denoncuar shpesh se ka lidhje me bashkëshorten e ministrit të Shtetit për Pushtetin Vendor, Arbjan Mazniku, Mirela Lika.
“Sot, e Diel data 06.07.2025 rreth ores 10 nje turmë miks ‘Taks Force’ kaluan ne menyre denostrative tek ambjentet e Pazarit te Ri, Tirane gjoja per “zaptimin e hapesirave publike”. 5 minuta sapo ky taborr administativo-patronazhist u largua, tek lokali qe publikisht eshte denoncuar si i gruas se ministrit Mazniku, puntoret filluan te zaptojne rrugen perpara ketij lokali sic deshmohet ne fotot qe po ju dërgoj,” shkruan një qytetar.
Me sa duket, ndëshkimi selektiv ka filluar edhe në këtë nismë që pritej t’u jepte pak hapësirë qytetarëve të thjeshtë, të cilët vuajnë mungesën e trotuareve dhe parkimeve, që shpesh bllokohen nga biznese ose persona të paautorizuar.
Kjo ngjarje ngre pikëpyetje mbi zbatimin e drejtë të kësaj nisme të re kombëtare. A është vërtetë qëllimi i nismës lirimi i hapësirave publike, apo thjeshtë ndëshkimi me gjoba i disa prej zaptuesve të vegjël dhe që nuk kanë lidhje me pushtetin?
RESTORANTI “THE HOME” I FAMILJARËVE TË MAZNIKUT DHE FUGËS
Në media, i cili është nën hetim edhe nga SPAK, është denoncuar restoranti “The Home”, i ndodhur në një vilë të rinovuar dykatëshe në zemër të Pazarit të Ri në Tiranë.
Restoranti është në pronësinë familjare të Arbjan Maznikut dhe Endri Fugës; i pari ish-nënkryetar i Bashkisë së Tiranës që mban sot postin e ministrit të Shtetit për Qeverisjen Vendore dhe i dyti këshilltari jetëgjatë i kryeministrit Edi Rama dhe drejtor i Agjencisë për Media dhe Informim. Në Qendrën Kombëtare të Bizneseve, kompania është regjistruar në pronësinë e bashkëshorteve të tyre, Marinela Lika me 50% të aksioneve dhe Besa Fuga me 50%.
Mazniku është nën hetim nga SPAK lidhur me shpenzimet e bashkisë së Tiranës tek restorantin në fjalë dhe lidhjet e këtij investimi me një tender të kompanisë publike, Tirana DC, e cila ngrenë pikëpyetje për konflikt interesi.
Natën e ndërrimit të viteve më 31 dhjetor 2023, një grup zyrtarësh u mblodhën për të trokitur gotat tek “The Home”. Darka përbëhej nga 55 persona dhe u pagua nga Bashkia e Tiranës me një faturë prej 236 mijë lekësh në total. Kjo përbën një konflikt të hapur interesi, pasi shpenzimi i parave publike në restorantin e bashkëshortes ka ndodhur gjatë kohës që Mazniku ishte nënkryetar bashkie
Të dhënat e siguruara nga BIRN tregojnë se një tjetër kompani e lidhur me restorantin “The Home” ka fituar tendera me vlerë rreth 800 mijë euro me kompaninë publike Tirana DC dhe Bashkinë e Tiranës gjatë viteve 2021-2022. Edhe pse këto kontrata nuk janë të paligjshme, ato ngrejnë dyshime për një konflikt interesi në dukje për ish-nënkryetarin e bashkisë dhe ministrit aktual të shtetit për Qeverisjen Vendore.
Tirana DC është një shoqëri aksionere në pronësi të Bashkisë së Tiranës, e cila u drejtua fillimisht nga Redi Molla dhe më pas nga Mariglen Qato, dy drejtorët e arrestuar me akuzën e përfitimit të miliona lekëve para publike përmes kompanisë “5D Konstruksion”, që sipas Prokurorisë së Posaçme, kontrollohej prej tyre. Molla dhe Qato i mohojnë akuzat. Mazniku ka mbajtur gjithashtu një pozicion të rëndësishëm në kompaninë Tirana DC si kryetar i Këshillit të Administrimit.
Arbjan Mazniku ka dëshmuar më 22 Korrik për rreth 3 orë në Prokurorinë e Posaçme, por nuk dihet nëse është pyetur për çështjen në fjalë apo jo.
Rruga Press