Gjykata amerikane vendos: Trump nuk ka imunitet presidenti, mund të ndiqet penalisht për kaosin në vitin 2020

Donald Trump nuk ka imunitet presidenti dhe mund të ndiqet penalisht nën akuzat për komplot për të përmbysur zgjedhjet e vitit 2020, u tha në verdiktin e gjykatës në Washington DC.

Siç raporton BBC, Trump ka argumentuar në një çështje ligjore historike se ai është i imunizuar nga akuzat penale. Megjithatë, aktgjykimi e hodhi poshtë kërkesën në fjalë.

Është një pengesë për Trumpin, i cili ka kërkuar imunitet presidencial për vite me radhë ndërsa përballet me akuza në shumë raste.

Ish-presidenti pritet të apelojë vendimin, që do të thotë se çështja mund të shkojë përfundimisht në Gjykatën e Lartë, ku konservatorët kanë një shumicë 6-3, shkruan BBC.

Prokurori special amerikan Jack Smith akuzoi Trump, 77 vjeç, për komplot për të përmbysur fitoren e Joe Biden në zgjedhjet e vitit 2020, dhe për mashtrim për të qëndruar në detyrë.

Gjykimi në atë rast fillimisht ishte caktuar për 4 mars, por u shty deri në marrjen e vendimit për kërkesën për imunitet.

Mund të ketë një vonesë tjetër nëse çështja përfundon në Gjykatën e Lartë. Në fillim të këtij muaji, një panel gjyqtarësh dëgjuan çështjen në Gjykatën e Apelit të Qarkut në Washington D.C.

Argumenti i avokatit të Trump bazohej në idenë se një president që nuk është fajësuar nga Kongresi, nuk mund t’i nënshtrohet procedimeve penale.

Ai vuri në dukje se Trump u fajësua nga Dhoma e Përfaqësuesve, por Senati nuk e konfirmoi vendimin e përmendur.

Megjithatë, gjyqtarët dukeshin skeptikë. Gjykatësja Florence Pan sugjeroi që, me imunitet, presidenti mund të shiste sekrete shtetërore ose të urdhëronte vrasjen e një rivali politik pa frikën e ndjekjes penale.

Rruga Press