Gjukanoviqi ndryshe nga Abazoviqi: Na duhet BE-ja, jo alternativa të tjera si Ballkani i Hapur

Presidenti i Malit të Zi, Milo Gjukanoviq është shprehur se qëndrimi i tij ndaj Ballkanit të Hapur vazhdon të jetë kundërshtues.

Këtë ai e thotë në kohën kur Dratan Abazoviqi, tashmë kryeministër i Malit të Zi, ka treguar prirje për ta mbështetur nismën e iniciuar prej presidentit serb, Aleksanar Vuçiq.

Presidenti malazez pati edhe një takim me presidentin gjerman, Frank-Walter Steinmeier, ku në përfundim të këtij takimi theksoi se shteteve të rajonit dhe Malit të Zi u duhet të ndjekin rrugën e antarësimit në Bashkimin Evropian, dhe jo alternativa të tjera, siç ai e konsideron Ballkanin e Hapur.

“Ne kemi qëndrime të ndryshme për këtë iniciativë. Unë kam dëgjuar shumë herë prej tij se si pjesë e mbështetjes së tij për të gjitha nismat rajonale, e mbështet edhe këtë. Gjithashtu, disa herë e kam deklaruar publikisht se nuk mendoj që kjo është një nismë optimale. Atë e shoh më tepër si një lloj kopje të Procesit të Berlinit”, tha Gjukanoviqi.

Përveç Malit të Zi, si një nga gjashtë shtetet e Ballkanit Perëndimor, as Kosova dhe as Bosnje-Hercegovina nuk e kanë përkrahur Ballkanin e Hapur.

“Nuk mendoj se kemi nevojë për alternativë, kemi nevojë për anëtarësim. Prandaj mendoj se është krejtësisht e natyrshme që ne të vazhdojmë procesin e negociatave me BE-në me shpejtësi të plotë. Unë besoj se kjo Qeveri do ta bëjë këtë.”, theksoi Gjukanoviqi.

Presidenti i Malit të Zi, do të ketë një vizitë zyrtare të mërkurën në Kosovë, në përgjigje të ftesës së presidentes së Republikës së Kosovës, Vjosa Osmani.

Rruga Press