Gjimshiti humbet Kombëtaren/ Polonia “fërkon” duart, Sylvinho me “dhimbje koke

Kombëtarja shqiptare e futbollit po përgatitet për fazën kualifikuese të EURO 2024, por për teknikun brazilian Sylvinho kanë nisur “dhimbjet e kokës” pasi do të ketë vështirësi për të krijuar formacionin ideal për ndeshjen e parë ndaj Polonisë.

Problemet për kuqezinjtë janë më të theksuara në prapavijë, aty ku Sylvinho do e ketë të vështirë për të zgjedhur gardianin mes shtyllave, pasi Berisha, Strakosha dhe Selmani nuk janë në 100% të formës së tyre, pasi kanë luajtur shumë pak minuta me ekipet respektive.

Sikur të mos mjaftonte “halli” për një gardian efikas në katërkëndësh, Shqipëria do të jetë e privuar edhe nga shërbimet e mbrojtësit, Berat Gjimshiti.

Në momentin e tij më të mirë, pasi ishte rikthyer me kohë të plotë si titullar tek Atalanta, Gjimshiti “parkon” sërish në infermieri. Qendërmbrojtësi kuqezi doli nga fusha i dëmtuar në fundin e pjesës së parë, në sfidën kundër Napolit.

Diagnozat e para flasin për një tërheqje muskulore në kofshën e majtë. Gjimshiti pritet të mungojë në sfidën e radhës kundër Empolit në Serie A ndërsa pritet të rikthehet në fushë vetëm pas pauzës që sjellin sfidat në kualifikueset e “Euro2024”.

Ky është pa diskutim një lajm shumë i hidhur për trajnerin Sylvinho i cili duhet të bëjë llogaritë pa shërbimet e Gjimshitit për sfidën hapëse të kualifikueseve kundër Polonisë më 27 mars.

Rruga Press