Gazeta britanike, The Telegraph: Perëndimi duhet ta mbrojë Kosovën nga Serbia dhe Rusia

Perëndimi po dështon ta mbrojë Kosovën nga agresioni serb dhe rus për shkak të politikave të tij naive dhe të njëanshme, kanë paralajmëruar politikanë të lartë nga Britania dhe SHBA.

Në një letër në të cilën pati qasje edhe gazeta prestigjioze britanike The Telegraph, ata thanë se qasja e Perëndimit për kombndërtimin në Kosovë është “me të meta” dhe do ta lërë të pambrojtur aleatin e saj ballkanik.

“Kosova është një vend sovran dhe demokraci funksionale”, thanë 54 politikanët në letrën e dërguar. “Përpjekjet për t’i prishur zgjedhjet demokratike në Kosovë nga Serbia duhet të kritikohen publikisht si ndërhyrje e huaj”.

Letra iu drejtua James Cleverly, Ministri i Jashtëm i Mbretërisë së Bashkuar, Antony Blinken, sekretari amerikan i shtetit dhe Josep Borrell, shefi i çështjeve të jashtme të BE-së.

Tensionet janë intensifikuar në veri të Kosovës këtë vit, me Serbinë e cila e akuzon qeverinë e Kosovës për “spastrim etnik të heshtur” dhe qeveria e Kosovës duke akuzuar Serbinë për nxitje të trazirave.

Diplomatët perëndimorë kanë thënë gjithashtu se lufta e Rusisë në Ukrainë ka i përkeqësuar dallimet. Serbia është një aleat tradicional rus edhe pse e ka dënuar pushtimin e Rusisë në Ukrainë duke mos iu bashkuar sanksioneve perëndimore. Kosova ka qenë një aleat i vendosur perëndimor që kur NATO e mbështeti atë në luftën e viteve 1998-99.

Dhuna shpërtheu në muajin maj midis policisë serbe dhe kosovare dhe paqeruajtësve të KFOR-it të udhëhequr nga NATO pas zgjedhjeve të diskutueshme. Serbia madje për pak kohë e vendosi ushtrinë e saj në gatishmëri.

“Mungesa e presionit të ushtruar ndaj Serbisë pas ndalimit arbitrar të tre policëve kosovarë dhe dështimi për të mbajtur përgjegjësi për sulmet ndaj KFOR-it, e nxjerr në pah mungesën aktuale të paanshmërisë”, thuhetnë letrën e politikanëve.

“Ende po tregohemi shumë të butë me serbët”

BE-ja ka dërguar diplomatë të lartë në Beograd dhe Prishtinë që nga trazirat në maj dhe SHBA pezulloi Serbinë nga një stërvitje ushtarake dhe gjithashtu sanksionoi kreun e shërbimeve të saj të sigurisë për promovimin e interesave të Kremlinit, por letra e politikanëve thotë se Perëndimi ende është shumë i butë me serbët.

“Zbulimet e fundit të depove të armëve në veri të Kosovës dhe raportet për kontrabandën e vazhdueshme të armëve përtej kufirit Serbi-Kosovë nxjerrin në pah rreziqet e përshkallëzimeve të mëtejshme”, thanë ata.

Analistët kanë thënë se Kremlini gjithashtu ka nxitur trazira në Kosovën veriore të dominuar nga serbët. Njësitë e saj të fuqishme të propagandës kanë ngritur stacione televizive në Beograd, duke nxjerrë lajme që promovojnë botëkuptimin e saj.

Mijëra serbë nacionalistë pro-rusë marshuan nëpër Beogradin qendror disa ditë pasi Kremlini e pushtoi Ukrainën vitin e kaluar në mbështetje të luftës dhe përqindja e serbëve që mbështesin anëtarësimin në BE ka rënë. Në dhjetor, një sondazh i qeverisë tregoi se 43 përqind e qytetarëve të Serbisë janë në favor të bashkimit me BE-në, krahasuar me 54 përqind sa ishte një vit më parë.

Rruga Press