FSK-ja ndihmon në trajnimin e ushtarëve ukrainas
Forca e Sigurisë së Kosovës (FSK) po jep kontribut në mbështetje për trajnimin e ushtarakëve nga Ukraina duke ndihmuar kështu në stërvitjen e përbashkët Interflex në Mbretërinë e Bashkuar me partnerët për t`u përballur me agresionin rus në Ukrainë.
Në njoftim bëhet e ditur se FSK-ja është duke operuar me kontingjentin e katërt që nga fillimi i pjesëmarrjes në operacionin Interflex, ku i është bashkangjitur Kompanisë Echo, e udhëhequr nga njësia nga Zelanda e Re. Kjo kompani përbëhet nga katër njësi nga shtete të ndryshme Zelanda, Kosova, Estonia dhe Lituania.
Kontingjenti i FSK-së është duke kryer detyrat e planifikimit, përgatitjet e nevojshme logjistike dhe ekzekutimi i kurseve 5-javore për forcat ukrainase. Gjatë periudhës së angazhimit, kompania Echo ka përfunduar gjithsej tri kurse të trajnimit për forcat ukrainase.
Misioni dhe qëllimi i kontingjentit të FSK-së është përgatitja e pjesëtarëve të forcave ukrainase për udhëheqës të skuadrës, taktikat e luftimit nga niveli individual deri në nivelin e skuadrës, si patrullat, operacionet sulmuese dhe mbrojtëse, procedura e udhëheqjes së trupave, lidership, komandë-kontroll, përdorimi i dronëve dhe qitje taktike.
Rruga Press