Franca nis fushatën e rekrutimit për shërbimin e ri ushtarak kombëtar

Qeveria dhe komanda ushtarake franceze po nisin sot një fushatë për të rekrutuar disa mijëra të rinj për një shërbim të ri ushtarak kombëtar dhjetëmujor, raportuan mediat franceze.

Kjo iniciativë u njoftua në nëntor 2025 nga presidenti francez, Emmanuel Macron me qëllim përmbushjen e nevojave të forcave të armatosura në kushte të rritjes së rrezikut të konfliktit, raporton e përditshmja “Figaro”.

Kur e njoftoi këtë projekt më 27 nëntor, Macron specifikoi se shërbimi i ri kombëtar do të ishte ushtarak dhe rekrutët do të shërbenin ekskluzivisht në tokën franceze.

Ushtria planifikon të fillojë përzgjedhjen e rekrutëve këtë muaj, të cilët do të fillojnë me një muaj trajnim, i ndjekur nga nëntë muaj shërbim në ushtri.

Për shkak të kufizimeve buxhetore, programi do të zbatohet gradualisht: viti i parë do të mbulojë 3,000 të rinj, me një objektiv prej 10,000 në vit deri në vitin 2030 dhe një numër të mundshëm prej 42,500 rekrutësh deri në vitin 2035.

Tetëdhjetë përqind e vullnetarëve do të jenë burra dhe gra të rinj të moshës 18-19 vjeç, ushtarë të ardhshëm për të cilët shërbimi ushtarak do të përfaqësojë një vit pushim para arsimit të lartë dhe do të vlerësohen në procesin e aplikimit në universitet.

Të rekrutuarit e tjerë do të jenë deri në 25 vjeç dhe do të përzgjidhen në bazë të specializimit profesional (inxhinierë, infermierë, përkthyes, etj.).

Rruga Press