Forcohet bashkëpunimi Kosovë-ShBA: FBI-ja dërgon agjent special dhe analist intelegjence për të punuar me Policinë e Kosovës
Drejtori i Përgjithshëm i Policisë së Kosovës, kolonel Gazmend Hoxha, së bashku me menaxhmentin e lartë të Policisë së Kosovës, priti në një takim zyrtar Atasheun Ligjor të FBI-së, z. Brendan Collins, si dhe Atasheun e Departamentit të Drejtësisë së Shteteve të Bashkuara të Amerikës (DOJ-ICITAP), znj. Kimberly Riffe.
Gjatë takimit, përfaqësuesit amerikanë prezantuan dy zyrtarë të FBI-së – një agjent special dhe një analist të inteligjencës – të cilët do të angazhohen në bashkëpunim të ngushtë dhe paralel me Policinë e Kosovës gjatë muajve në vijim, në funksion të forcimit të kapaciteteve hetimore dhe analitike.
Diskutimet u fokusuan në planet e bashkëpunimit të ardhshëm, forcimin e partneritetit strategjik dhe thellimin e koordinimit ndërinstitucional. Palët riafirmuan përkushtimin për bashkëpunim të plotë në fushën e hetimeve penale dhe shkëmbimit të inteligjencës, me synim rritjen e sigurisë së përgjithshme dhe luftimin efektiv të krimit.
Policia e Kosovës vlerësoi lart mbështetjen e vazhdueshme të institucioneve të sigurisë së Shteteve të Bashkuara të Amerikës, duke e konsideruar këtë bashkëpunim si një shembull të shkëlqyer të partneritetit profesional dhe strategjik, në shërbim të sigurisë së qytetarëve dhe sundimit të ligjit.
Rruga Press