Fetoshi: Nata e tmerrit në Mitrovicë, krim që ende pret aktakuzë

Drejtori i Institutit për Studime të Luftës Hibride “Octopus”, Arben Fetoshi, ka kujtuar 26-vjetorin e ngjarjeve të 3 dhe 4 shkurtit 2000 në veri të Mitrovicës, duke i cilësuar ato si një operacion të organizuar për spastrimin etnik të shqiptarëve, që ende mbetet pa aktakuzë.

Në një postim në Facebook, Fetoshi shkruan se sulmi, i maskuar si “huliganizëm”, u krye me bomba, snajperë dhe armë automatike, nën praninë e Policisë së UNMIK-ut dhe trupave të KFOR-it. Sipas tij, ajo që u quajt “nata e tmerrit” ishte një operacion i mirëplanifikuar i përndjekjes etnike, që la 10 shqiptarë të vrarë, përfshirë gra, fëmijë dhe të moshuar, 25 të plagosur dhe dhjetëra të keqtrajtuar fizikisht.

Ai thekson se qëllimi i dhunës ishte dëbimi i shqiptarëve nga veriu i Mitrovicës, duke detyruar rreth 12 mijë qytetarë të kalonin në jug të qytetit, në prani të forcave ndërkombëtare.

Fetoshi e lidh këtë ngjarje me strategjinë serbe të pasluftës, duke e cilësuar “Natën e tmerrit” si operacionin e parë të strukturave hibride për destabilizimin e veriut dhe sabotimin e shtetit të Kosovës, një proces që, sipas tij, ka kulmuar vite më vonë me sulme dhe akte terroriste.

“Nata e tmerrit mbetet krim i dëshmuar që ende pret drejtësi”, përfundon Fetoshi.

Rruga Press