Festë dhe në tribuna për suksesin e Nora Gjakovës, ky ishte reagimi i Majlinda Kelmendit dhe Distria Krasniqit
Nora Gjakova ka shkruar historinë duke u kualifikuar në finale të xhudos në Lojërat Olimpike.
Gjakova kësisoj i ka siguruar një tjetër medalje olimpike shtetit të Kosovës, shkruan Demokracia.com.
Xhudistja kosovare për të kaluar në finale kishte pengesë xhudisten japoneze Tsukasa Yoshidën të cilën e kaloi në kohën shtesë.
Gëzimi në fytyrën e Nora Gjakovës ishte i madh pas triumfit në Tokio, ndërsa festë pati edhe në tribuna ku ishin të vendosura edhe dy xhudistet tjera Majlinda Kelmendi dhe Distria Krasniqi.
Në disa fotografi të publikuara nga faqja zyrtare e Komitetit Olimpik të Kosovës shihen dy kampionet olimpike të ngritura në këmbë duke duartrokitur për suksesin e Norës.
Nora Gjakova në finale do të përballet me xhudisten franceze, Sarah Cysique.
Kujtojmë se Distria Krasniqi e fitoi medaljen e artë në Lojërat Olimpike në ditën e parë, ndërsa Majlinda Kelmendi u eliminua në luftën e parë.