Fermerët e Dimalit në Shqipëri drejt falimentimit: Çmimet e ulëta dhe mungesa e tregut kërcënojnë prodhimin e agrumeve

Fermerët e fshatit Hinkë, në bashkinë Dimal, po përballen çdo vit e më shumë me rrezikun e falimentimit. Ndërsa prodhimi i agrumeve këtë sezon ka qenë i bollshëm dhe me cilësi të lartë, sfidat kryesore mbeten mungesa e tregut, çmimet e ulëta dhe fuqia e reduktuar punëtore.

Sipas banorëve të zonës, çmimi i manderinave është shumë më i ulët krahasuar me vitin e kaluar, duke i lënë fermerët në pamundësi për të mbuluar kostot minimale të kultivimit.

Fermerët shprehen se, ndonëse prodhimi këtë vit është cilësor, tregu po i penalizon rëndë:

“Prodhimi sivjet është i mbarë dhe më cilësor se vitet e tjera, por po na penalizon çmimi i ulët, sidomos tani në fillim të sezonit. Jemi dobët me tregun. Në behar shkojmë në Greqi të punojmë për të nxjerrë shpenzimet e manderinave: plehra, helme, spërkatje etj. Me këtë çmim që na ofrojnë pikat e grumbullimit, nuk mbulojmë dot as kostot”, – thonë fermerët.

Ata shtojnë se shërbimi ndaj pemëve është i vazhdueshëm dhe kërkon investime të konsiderueshme: spërkatje, vaditje, krasitje, hedhje plehrash dhe pesticide.

Sipas fermerëve, procesi i vjeljes po bëhet gjithnjë e më i vështirë për shkak të mungesës së krahut të punës. Shumica e banorëve të zonës kanë emigruar dhe gjatë sezonit është thuajse e pamundur të gjesh punëtorë.

Megjithatë, ata theksojnë se prodhimi i tyre është brenda të gjitha standardeve, me përdorim të kontrolluar të pesticideve dhe produkteve të lejuara.

Fshati Hinkë, në Njësinë Administrative Poshnje, njihet prej dy dekadash për kultivimin e agrumeve. E gjithë zona është e mbjellë me manderina dhe pemë të tjera frutore. Kushtet klimatike dhe tokësore e kanë bërë këtë territor të favorshëm për bujqësi, duke bërë që agrumet të kthehen në burimin kryesor ekonomik të banorëve.

Por sot, përballë tregut të pasigurt dhe çmimeve të ulëta, fermerët thonë se janë në prag të dorëzimit.

Rruga Press