Evropa vazhdon të pranojë çdo ditë mbi 100 mln m³ gaz nga Rusia

Kompania ruse Gazprom ka siguruar se transporti i gazit përmes territorit të Ukrainës është duke vazhduar në përputhje me marrëveshjet, sipas të cilave 109 milionë metër kub dërgohen çdo ditë në Evropë.

Tregtia e gazit mes Rusisë dhe Evropës po shkon pa probleme, sipas Gazpromit, tregtarit më të madh gazit në Rusi, raportoi Reuters ditë më parë.

Varësia nga gazi rus ka bërë që vendet evropiane të përjashtojnë mundësinë e sanksionimit të Gazpromit, tash për tash.

“Gazpromi po furnizon Evropën me gaz rus përmes Ukrainës në përputhje me kërkesat e klientëve evropianë në shumën prej 109.6 milionë metra kub (15 mars)”, tha zëdhënësi i Gazpromit, Sergei Kupriyanov.

Rusia siguron rreth 40% të nevojave të Evropës për gaz, në një masë të madhe përmes tubacioneve të gazit që kalojnë përmes Ukrainës.

Pas agresionit rus ndaj Ukrainës, vendet e Bashkimit Evropian vendosën të reduktojnë varësinë e tyre nga gazi rus me dy të tretat deri në vitin 2023. SHBA-ja ka hequr tërësisht dorë nga gazi rus.

Rruga Press