Evropa bëhet kreative për të nxitur vaksinimin e qytetarëve

Në të gjithë Evropën qytetarët nxiten fuqimisht të vaksinohen. Në Britani të Madhe bëhet thirrje që të bëhet doza përforcuese pasi është vënë re rritje e të infektuarve me variantin Omicron.

Në Londër, një autobus po përdoret si një qendër vaksinimi. Autoritetet synojnë të ndjekin shembullin e SHBA duke reduktuar karantinimin nga COVID në vetëm 7 ditë, një masë kjo që pritet të lehtësojë presionin në sektorë të ndryshëm të ekonomisë.

“Unë do t’i referohem gjithmonë këshillave shkencore. Sigurisht që do të ndihmonte në lehtësimin  e disa prej presioneve që ka  mbi shkollat, fuqinë punëtore  etj. Por unë do të ndikohesha  absolutisht nga këshillat e ekspertëve”, tha  Nadhim Zahawi, sekretari britanik për Edukim.

Në Spanjë, një rritje e riinfektimeve me coronavirus në dy javët e fundit ka tejkaluar numrin total të infeksioneve të dokumentuara gjatë pjesës së dytë  të pandemisë.

Ajo që quhet vala e gjashtë po fillon të rëndojë sistemin e kujdesit shëndetësor të Spanjës dhe shërbimet e tjera.

Edhe një herë është nevoja për t’u izoluar.

“Vetëm këtë javë pesë ose gjashtë kolegë janë infektuar, kështu që është e pamundur për departamentin të na dërgojë njerëz”, shprehet Sara Arassar, menaxhere e dyqanit.

Qyteti gjerman i Këlnit po ofron një përvojë të pazakontë vaksinimi duke mirëpritur fëmijët e moshës pesë deri në njëmbëdhjetë dhe prindërit e tyre në bordin e një Airbus.

“Mendoj se është një fushatë fantastike. Për fëmijët, është diçka krejtësisht ndryshe nga pediatria, dhe gjithçka është e organizuar shumë mirë këtu, gjithçka shkoi mirë. Shumë mirë!”, thotë Susanne Manitz, mësuese.

Ndryshe nga pjesët e tjera të botës, të cilat janë hapur pas fushatave të vaksinimit, Kina i është përgjigjur një numri të vogël të rasteve lokale me testime masive dhe bllokime të rrepta. Qyteti port kinez i Tianjin po synon të testojë 14 milionë banorët e tij brenda 48 orëve pas zbulimit të disa rasteve me coronavirus./euro/

Rruga Press