Eurodeputeti austriak: Kosova, demokracia më e fortë në Ballkanin Perëndimor

Eurodeputeti austriak, Lukas Mandl, ka deklaruar se dialogu Kosovë-Serbi nuk zhvillohet mes dy qytetesh, por shtetesh, dhe kjo sipas tij duhet të theksohet nga Bashkimi Evropian.

Mandl në Komisionin Parlamentar për Stabilizim Asociim BE-Kosovë ka thënë se dialogu mes të dyja shteteve është përgjegjësi e gjithë Bashkimit Evropian.

“Është nder dhe kënaqësi të flas në zemër të demokracisë së shtetit më të ri në Evropë dhe qartazi demokracisë më të fortë në Ballkanin Perëndimor, në Parlamentin e Republikës së Kosovës. Ky nuk është dialog mes dy qytetesh, nuk po flet kryetari i Beogradit me atë të Prishtinës, por është dialog mes dy shtetesh. Kjo duhet të bëhet e qartë. BE-ja ka çdo arsye ta theksojë se ky është dialog mes dy shtetesh. Është e rëndësishme që BE-ja ta ndërmjetësojë dialogun dhe ne do të jemi konstruktiv por kritikë se si ky dialog rrjedh. Nuk nënvlerësojmë mbështetjen e SHBA-së për dialogun”.

Mandl ka shtuar se Serbia do të ishte makineri ekonomike për Ballkanin Perëndimor po qe se nuk do të flitej më për të kaluarën.

“Ne ende po flasim për të kaluarën, për ideologjitë, në ende duhet të merremi me nacionalizma, urrejtje e paragjykime ndërkohë që jetojmë në një botë ku të gjithë jemi në Evropë. Nëse bashkëpunimi do të ishte fokusi, Serbia do të ishte si Gjermania, në kuptimin ekonomik për Ballkanin Perëndimor. Ky do të ishte një vizion optimist për të ardhmen. Kjo do të ndodhë nëse nuk do të flisnim kaq shumë për të kaluarën dhe ideologjinë e urrejtjes”.

Rruga Press