Është mesditë në Ukrainë. Ja çfarë dihet deri më tani
Përpjekjet për të evakuuar Mariupolin vazhdojnë, por qyteti i rrethuar juglindor mbetet nën bombardimet ruse.
Këto janë zhvillimet më të fundit mbi luftën e Rusisë në Ukrainë:
Fabrika e çelikut Azovstal: Presidenti rus Vladimir Putin tha të enjten se nuk ka nevojë të sulmohet zona industriale rreth fabrikës së çelikut Azovstal në Mariupol dhe se ata që zgjedhin të dorëzohen duhet të trajtohen në përputhje me konventat ndërkombëtare. Më herët, ministri rus i mbrojtjes Sergei Shoigu i tha Putinit se forcave ruse do t’u duhen tre deri në katër ditë për të marrë nën kontroll uzinën.
Mariupol: Katër autobusë evakuimi arritën të largohen nga qyteti i rrethuar i Mariupolit të mërkurën përmes një korridori evakuimi, tha të enjten zëvendëskryeministrja ukrainase Iryna Vereshchuk. Megjithatë, bashkëkomandanti i një prej njësive ukrainase të rrethuar në port tha të enjten se forcat ruse vazhduan bombardimin e qytetit në mes të negociatave për evakuimin e civilëve.
Ofensiva Lindore: Serhii Haidai, kreu i administratës ushtarake rajonale të Luhansk, i tha CNN-nit të mërkurën se 80% e territorit të Luhanskut është nën kontrollin rus në mes të një beteje të madhe për kontrollin e rajonit të Donbasit.
Mungesa e armëve të rënda: Presidenti ukrainas Volodymyr Zelensky tha se forcat e tij nuk kanë mjaftueshëm armë “serioze dhe të rënda” për të mposhtur ushtrinë ruse në Mariupol.
Rusët pushtojnë Rubizhne qendrore: Videot në mediat sociale dhe të verifikuara nga CNN-ni tregojnë se forcat ruse në rajonin Luhanskut në Ukrainë kanë marrë Rubizhne qëndrore dhe fshatin e afërt të Kreminës. Videot vijnë pasi administratori ushtarak rajonal tha se 80% e rajonit të Luhansk është nën kontrollin rus.
Pjesë shtesë të forcave ajrore: Forcat Ajrore të Ukrainës kanë shtuar rreth 20 avionë operacionalë në flotën e saj për shkak të një fluksi të pjesëve rezervë, tha një zyrtar i lartë i mbrojtjes amerikane. Pa specifikuar se cili vend i ka siguruar pjesët, zyrtari tha se SHBA-ja dhe vendet e tjera kanë punuar “për t’u marrë pjesët që u nevojiten për t’i nxjerrë ato në ajër”.
Më shumë ndihmë e SHBA-së duke shkuar për Ukrainën: SHBA do të shpallë një raund të ri të ndihmës për sigurinë për Ukrainën “në një kohë shumë të shkurtër”, tha sekretarja e shtypit e Shtëpisë së Bardhë, Jen Psaki. CNN raportoi më parë se SHBA po përgatit një paketë tjetër ndihme ushtarake prej 800 milionë dollarësh.
Rusia teston raketën balistike ndërkontinentale: Ministria ruse e mbrojtjes tha se kishte kryer një lëshim provë të raketës së saj balistike ndërkontinentale Sarmat. Raketa u hodh nga rajoni Arkhangelsk i Rusisë veriore drejt vendit të testimit Kura në lindjen e largët të Rusisë. Shtetet e Bashkuara u njoftuan përpara testit të raketës dhe e gjurmuan atë nga afër. “Testime të tilla janë rutinë,” tha sekretari i shtypit i Pentagonit, John Kirby.
Largimi i G20: Ministrat e Financave nga shumë vende u larguan nga një sesion i G20 me dyer të mbyllura në Uashington, DC, kur delegati rus filloi fjalimet e tij të përgatitura, tha një person i njohur me seancën. Sekretarja e Thesarit e SHBA-së, Janet Yellen mori pjesë në largim, ashtu si edhe kryeministri kanadez Justin Trudeau së bashku me zyrtarë të tjerë perëndimorë dhe evropianë.
Rruga Press