Ekspozita dhe libri i BIRN tregojnë histori të vdekjeve të gazetarëve të luftës

Rrjeti Ballkanik i Gazetarisë Investigative po mban një ekspozitë dhe po boton një libër që përkujton gazetarët dhe punonjësit e medias që u vranë gjatë dhe menjëherë pas luftërave të viteve 1990 në ish-Jugosllavi.

Ekspozita “Last Despatches” e BIRN, që përkujton reporterët, fotografët dhe punonjësit e tjerë të medias që humbën jetën si rezultat i luftërave në Jugosllavi të viteve 1990, hapet të martën në mbrëmje në Sarajevë.

BIRN do të prezantojë gjithashtu një libër “Last Despatches”, i cili tregon historitë e 20 gazetarëve që u vranë përmes intervistave me familjet, kolegët dhe miqtë e tyre.

Prezantimi do të mbahet në një vend në Sarajevë, i cili nga viti i ardhshëm do të presë muzeun e ri të BIRN, Shtëpinë e Reporterëve, e cila do t’i kushtohet çështjeve të medias, luftërave në ish-Jugosllavi dhe sfidave të gazetarisë bashkëkohore.

Ekspozita dhe libri bazohen në serinë e gjatë në internet të BIRN, “Last Despatches”, e cila dokumenton disa nga 155 personat që vdiqën gjatë konflikteve dhe menjëherë më pas tyre.

Disa prej tyre ishin korrespondentë të huaj, por shumica e tyre ishin qytetarë të republikave ndërluftuese jugosllave. Disa u qëlluan ndërsa raportonin nga vijat e frontit, ndërsa të tjerët u qëlluan me armë zjarri në rrugët e vendlindjeve së tyre, apo edhe u vranë në zyrat e tyre.

“Ajo që është e vështirë të besohet është se deri më tani, vetëm një person është dënuar, sipas një vendimi të formës së prerë, si përgjegjës për ndonjë nga këto vrasje. Mungesa e ndonjë dënimi tjetër tregon se mosndëshkimi për dhunën ndaj gazetarëve dhe punonjësve të tjerë të medias ka vazhduar për dekada pas përfundimit të luftërave në Jugosllavi”, tha drejtoresha rajonale e BIRN, Marija Ristic.

“Ekspozita tregon historitë e disa prej këtyre reporterëve që raportuan me guxim luftën dhe pasojat e saj, duke ekspozuar mizoritë dhe shkeljet e të drejtave të njeriut pavarësisht nga rreziqet me të cilat përballeshin. Është një memorial për kolegët e humbur dhe një nderim për punën e tyre, por në të njëjtën kohë një kujtesë se ne kemi nevojë për media të lira për të ndërtuar shoqëri të lira”, shtoi Ristic.

Vendi i ekspozitës në Sarajevë vitin e ardhshëm do të bëhet një hapësirë e re muzeale dhe komunitare, nën emrin aktual “Shtëpia e Reporterëve”. Ai do të jetë muzeu i parë rajonal në Ballkan që tregon historinë gjithëpërfshirëse të shpërbërjes së ish-Jugosllavisë dhe luftërave që shpërthyen pasi shteti i bashkuar u shpërbë.

Muzeu do të ofrojë një rrëfim bindës, të bazuar në fakte, por nuk do të jetë thjesht një vend trashëgimie për historinë e kohës së luftës. Ai do të shërbejë gjithashtu si një hapësirë ku gazetarët mund të mblidhen dhe të diskutojnë çështje kritike me të cilat përballen shoqëritë e Evropës Juglindore dhe Qendrore, duke shkëmbyer ide me ekspertë nga jashtë rajonit rreth zhvillimit të gazetarisë cilësore dhe raportimit investigativ dhe rolit të medias në konflikte dhe në parandalimin e konflikteve.

Ekspozita “Last Despatches” hapet të martën dhe do të jetë e hapur çdo ditë nga ora 12:00 deri në orë 20:00 në Ferhadija 10, Sarajevë, nga 15 deri më 19 dhjetor./balkaninsight/

Rruga Press