E FUNDIT/ Dënohet me burg ish-Ministri i Brendshëm Saimir Tahiri

Është dhënë vendimi për dënim me burg për Saimir Tahirin.

Saimir Tahiri shpallet i fajshëm. Apeli i GJKKO ka vendosur të lërë në fuqi vendimin e GJKKO, që e dënoi me 5 vite heqje lirie, ndaj dhe sot u vendos të lihet në fuqi vendimi i mëparshëm. Tahiri u dënua nga GJKKO me 3 vite shërbim prove, Apeli i Posaçëm e ktheu për rigjykim.

Gjykata e Posaçme e Apelit ka dënuar me 3 vjet e 4 muaj burg ish-ministrin e Brendshëm, Saimir Tahiri, për shpërdorim detyre. Gjykata vendosi të lërë në fuqi vendimin e shkallës së parë, me ndryshim, moszbatimin e shërbimit të provës.

Gjykata mban në vëmendje shkallën e lartë të trafikut të narkotikëve, duke thënë se provohet tej çdo dyshimi se Tahiri ka përfituar nga Habilajt. Për Jaeld Çelen, në rastin e peshkarexhës “Fatima”, është vërejtur përfshirje e punonjësve të policisë.

Komunikohet në mënyrë të përmbledhur se, sot më datë 04.02.2022, në Gjykatën e Posaçme të Apelit për Korrupsionin dhe Krimin e Organizuar, u shpall vendimi për çështjen me nr. 47 regjistri themeltar, datë 24.11.2021 regjistrimi, në ngarkim të të pandehurve S.T. dhe J.Ç, ku kolegji i Gjykatës së Posaçme të Apelit për Korrupsionin dhe Krimin e Organizuar vendosi, lënien në fuqi të Vendimit nr. 60, datë 19.09.2019 të Gjykatës së Shkallës së Parë për Krimet e Rënda Tiranë, me ndryshimin si më poshtë:

-Moszbatimin e nenit 59 të Kodit Penal për të pandehurin z. S.T.

-Vuajtja e dënimit me burgim për të pandehurin z. S.T. fillon nga dita e ekzekutimit të këtij vendimi dhe të kryhet në një burg të sigurisë së zakonshme”.

Vendimi i Gjykatës së Posaçme të Apelit

Gjykata konkluduar se janë të provuara:

– Lidhja e qëndrueshme në kohë dhe e dokumentuar me Moisi dhe Artan Habilajn.

– Lidhje të tille të pashpjegueshme të tyre me ministrin, që janë të njohura në komunitetin e funksionarëve lokalë e qendrorë, kanë krijuar premisa më të favorshme për grupin kriminal për infiltrimin e tyre në radhët e policisë e të shtetit, duke sjellë për pasojë vështirësi dhe pengesa shtetit në luftën ndaj veprimtarisë kriminale.

Gjykata mban në vëmendje shkallën e lartë të aktiviteteve të paligjshme furnizuese me lëndë të parë të trafikut të narkotikëve që krijon lidhjen e drejtpërdrejtë të mosveprimit në mënyrë të paligjshme të autoriteteve shtetërore.

Nuk janë marrë masat e duhura për të vënë në eficencë policinë e Vlorës për parandalimin.

I pandehuri ka përfituar nga Moisi e Artan Habilaj shërbime e përfitime të padrejta duke cenuar interesat e shtetit.

Në seancën e së hënës së kaluar, prokurorët e SPAK kërkuan deklarimin fajtor të Tahirit për akuzat që e lidhin atë me trafikun e drogës, në kuadër të grupit të strukturuar kriminal dhe dënimin e tij me 12 vjet burg. Por, duke qenë se gjykimi është bërë me procedurë të shkurtuar, kërkuan që të ulet edhe 1/3 e dënimit, duke kërkuar një dënim përfundimtar prej 8 vitesh burg.

Sipas prokurorisë, Tahiri dhe i bashkëpandehuri i tij, Jaeld Çela, kanë garantuar grupin e “Habilajve” në trafikun e sasive të mëdha të kanabisit nga Shqipëria në Itali. Por Tahiri pretendonte se nuk qëndron asnjë prej akuzave të ngritura kundër tij, duke thënë se nuk ka pasur asnjë kontakt me anëtarët e grupit të Habilajve.

Gjykata e Shkallës së Parë nuk pranoi ta deklaronte fajtor për këto akuza, por e dënoi për veprën penale të shpërdorimit të detyrës, duke e dënuar me 3 vite e 4 muaj burg, vendim që u konvertua në 3 vite shërbim prove. Vendimi u kundërshtua nga Prokuroria dhe Tahiri.

Në shtator 2021, Gjykata e Lartë vendosi të rikthejë edhe një herë për gjykim në Apel çështjen e ish-ministrit të Brendshëm. Gjykata e Lartë vendosi që këtë herë çështjen ta drejtojë një tjetër trupë gjykuese, duke miratuar kërkesën e avokatit të Tahirit, Maksim Haxhia. Rekurs për çështjen kishte bërë edhe prokuroria, e cila kërkonte dënimin e Tahirit me 12 vite burg për “trafik narkotikësh” dhe “grup të strukturuar kriminal”.

Përballja e Tahirit me drejtësinë nisi në nëntor 2017, kur ai u dyshua si garantor i grupit të “Habilajve” në trafikun e drogës. Shkalla e Parë e Krimeve të Rënda, rrëzoi akuzat për trafik droge e grup kriminal dhe e fajësoi ish-ministrin për “shpërdorim të detyrës”. Apeli i Posaçëm e vlerësoi si të gabuar rikualifikimin e veprës penale për ish-ministrin dhe ktheu dosjen për rigjykim në Shkallën e Parë.