Domatet hidhen në kanal, Sharka: Mungon tregu, fermerët kanë shpenzuar shumë këtë sezon
Fermerët e Beratit dhe Fierit po e hedhin prodhimin e këtij sezoni në kanal. Dhjetra tonë domate nuk janë eksportuar dot në tregun e rajonit për shkak të rënies së konsumit nga pandemia.
Tregu i brendshëm është i pafuqishëm për të përballuar të gjithë prodhimin vendas. Kjo situatë po rëndon ekonomikisht fermerët, të cilët duhet të kishin nisur përgatitjet për sezonin e ardhshëm.
“Ka rënë kërkesa pasi nuk ka konsum në rajon. Sidomos zona e Beratit dhe Fierit po e shesin nën kosto.” shprehet Eduart Sharka, kryetari i Sindikatës së Fërmerëve.
Aktualisht një kilogram domate po blihet nga tregtarët me çmim nga 20 deri në 30 lekë. Çmim ky që nuk mbulon dot as shpenzimet e prodhimit për bimë.
“Fermerët kanë shumë shpenzime, dhe nuk po i mbulojnë dot, kështu që i hedhin në kanal. Salcë nuk bëhen pasi është domate për treg, jo për industri.”, shton ai.
Çmimi i domates në kryeqytet varion nga 70 deri në 100 lekë për kilogram. Tregëtarët thonë se furnizohen nga prodhimi vendas por jo në sasi të mëdha.
Sindikata e Fermerëve kërkon që Ministria e Bujqësisë të ngrejë zyra të studimit të tregjeve dhe orientimit për fermerët për mbjelljen e fruta-perimeve sipas kërkesës nga konsumatori.