Dogana e Kosovës realizon me sukses operacione kontrolli në Fushë Kosovë, Mitrovicë e Gjilan

Dogana e Kosovës, ka realizuar me sukses disa operacione kontrolli gjatë javës që po lëmë pas,  të cilat kanë çuar në zbulimin e aktiviteteve të ndryshme të paligjshme në disa lokacione të ndryshme të vendit.

Më poshtë janë detajet e rasteve të zbuluara:

Rasti 1: Fushë Kosovë – Zyrtarët e Doganës së Kosovës, pas një pune operative intensive, kanë organizuar një kontroll në një subjekt në Fushë Kosovë. Gjatë këtij kontrolli, është zbuluar një hapësirë për prodhimin/falsifikimin e mallrave dhe mallra pa prejardhje të qartë. Konkretisht, janë sekuestruar:  9 mijë e 560 copë maica për të rritur me marka të ndryshme, 4 mijë e 300 copë etiketa letre me mbishkrimin e firmave të njohura,  dhe disa makina qepje.

Lidhur me këtë rast, është njoftuar menjëherë Prokuroria. Pas intervistimit të palës së përfshirë, janë ngritur kallëzime penale për: Tregti të ndaluar, Prodhim të paautorizuar si dhe mashtrim të konsumatorëve.

Rasti 2: Mitrovicë – Njësitet e Doganës së Kosovës kanë kryer një kontroll në një subjekt që merrej me shitjen e automjeteve të përdorura në Mitrovicë. Gjatë këtij kontrolli, janë identifikuar 37 automjete të ndryshme të pazhdoganuara, të cilat subjekti kishte për qëllim t’i përdorte për pjesë këmbimi.

Automjetet janë dërguar për verifikim për të parë nëse janë të kërkuara, dhe pas përfundimit të kësaj procedure, rasti do të trajtohet më tej në koordinim me Prokurorinë.

Rasti 3: Gjilan – Doganës së Kosovës kanë kryer një kontroll në një subjekt tjetër, pas pranimit të një informate përmes rrugëve operative. Gjatë këtij kontrolli, është zbuluar dhe sekuestruar mall pa dokumentacion, i cili dyshohet se është kontrabanduar në Kosovë. Malli i sekuestruar përfshin: 10 copë helmeta të ndryshme për motoçikleta – të reja 16 copë goma të ndryshme për motoçikleta – të reja, 3 copë maska ballore për motoçikleta Yamaha Nmax – të përdorura

Ndaj palës janë inicuar procedurat kundërvajtëse.

Rruga Press