Disa shtetas rusë anti-Putin sūlmojnë një qytet në Rusi

Një grup shtetasish rusë anti-Putin, të cilët janë në linjë me ushtrinë ukrainase, kanë marrë përgjegjësinë për një sulm në rajonin jugperëndimor rus të Belgorodit, pasi Moska tha se po luftonte një grup diversantësh atje.

Granatimet dëmtuan një ndërtesë administrative, disa ndërtesa banimi dhe një kopsht fëmijësh në zonë, sipas guvernatorit rajonal Vyacheslav Gladkov, i cili tha se nuk kishte viktima.

Në një postim në Telegram grupet që e quajnë veten “Legjioni i Lirisë së Rusisë” dhe “Trupat Vullnetare Ruse” thanë se kishin “çliruar” një vendbanim në rajonin Belgorod, i cili kufizohet me Ukrainën.

Një zyrtar ukrainas pranoi se njësitë kishin kryer një operacion në zonë, por këmbënguli se ato po vepronin në mënyrë të pavarur.

“Ne mund të konfirmojmë se ky operacion është kryer nga shtetas rusë”, tha për CNN Andriy Yusov, një përfaqësues i agjencisë së inteligjencës të mbrojtjes të Ukrainës.

Ai tha se njësitë ishin “pjesë e forcave të mbrojtjes dhe sigurisë” kur ishin në Ukrainë, por ishin të pavarura nga Kievi: “Në Rusi ata po veprojnë si entitete të pavarura”.

Zëdhënësi i Kremlinit Dmitry Peskov tha se forcat e Kremlinit po punonin për të larguar një “grup sabotazhi dhe zbulimi”, sipas medias shtetërore TASS.

Situata në Belgorod shënon “herën e parë” që forcat e linjës ukrainase kanë nisur “një operacion tokësor ndërkufitar kundër objektivave ruse”, sipas Sam Kiley të CNN.

“Kjo është në një shkallë të konsiderueshme dhe qartësisht synon të shkaktojë shqetësim të konsiderueshëm midis autoriteteve lokale të paktën, nëse jo në nivelin e Kremlinit,” tha Kiley për Lynda Kinkade të CNN në Connect the World.

Rruga Press