Deputetja ukrainase, Kira Rudik: Kur Trumpi thotë se pati një bisedë të mirë me Putinin, ne fshihemi në strehimore kundër bombave

Siç është raportuar sot në media, Vladimir Putin dhe Donald Trump mund të zhvillojnë një takim ballë për ballë së shpejti.

Kremlini tha se kjo mund të ndodhë në “ditët në vijim”, por u distancua nga mundësia e një takimi trepalësh që përfshinte Volodymyr Zelenskin.

Deputetja ukrainase, Kira Rudik, ka ndarë dyshimet e saj se sa të suksesshme do të jenë bisedimet – nëse ato do të vijojnë.

“Këtu në Ukrainë, sa herë që Trumpi thotë se pati një bisedë shumë të mirë me Putinin, ne fshihemi në strehimoret kundër bombave, sepse herën e mëparshme që ai bëri këtë deklaratë pati një sulm masiv në kryeqytetin e Ukrainës, duke vrarë dhjetëra njerëz”, tha ajo.

“Nuk jemi shumë optimistë sepse duket si një raund tjetër i kënaqjes së Putinit. Nëse Trumpi premtoi se do të kishte sanksione kundër Rusisë nëse nuk ka armëpushim, ato duhet të ndodhin. Tani për tani, ne ende po sulmohemi dhe Rusia ende po shtyn përpara në vijën e frontit. Jemi afër afatit dhe asgjë nuk ka ndodhur.”

Rudik vazhdoi duke thënë se Putini po “përpiqej të zvarriste” negociatat me shpresën për të arritur përparim në fushën e betejës.

“Nuk shohim ndonjë presion mbi Kremlinin deri më tani,” shtoi ajo.

Rruga Press