Delegatët e G20 do të organizojnë protesta kundër Rusisë për luftën në Ukrainë

Vendet perëndimore po përgatiten të organizojnë largime të koordinuara dhe mospërfillje të tjera diplomatike në shenjë proteste kundër pushtimit rus të Ukrainës në një takim të ministrave të financave të G20 në Uashington.

Sipas The Guardian, një zyrtar i thesarit amerikan ka thënë se sekretarja e Thesarit e SHBA-së, Janet Yellen, po planifikon të shmangë seancat e G20-s ku marrin pjesë zyrtarë rusë në margjinat e takimeve të Fondit Monetar Ndërkombëtar dhe Bankës Botërore të mërkurën. Megjithatë, Yellen do të marrë pjesë në një seancë hapëse për luftën në Ukrainë, pavarësisht nga pjesëmarrja ruse.

Moska konfirmoi të martën se ministri rus i financave, Anton Siluanov, do të drejtonte delegacionin e saj në bisedime pavarësisht protestave të përsëritura nga diplomatët perëndimorë.

“Gjatë dhe pas takimit ne do të jemi të sigurt që do të dërgojmë një mesazh të fortë dhe nuk do të jemi vetëm në këtë”– tha një burim i qeverisë gjermane.

Një zyrtar i ministrisë franceze të financave tha se ata prisnin që disa ministra nga vendet e G7 të largoheshin nga vendet e tyre kur homologu i tyre rus do të fliste.

Kancelarja e Mbretërisë së Bashkuar, Rishi Sunak, gjithashtu nuk do të marrë pjesë në disa sesione të G20, ku do të marrë pjesë një përfaqësues tjetër i qeverisë britanike, tha një zëdhënës i Thesarit.

Ndarjet e zgjeruara nga lufta në Ukrainë ngrenë pikëpyetje mbi të ardhmen e G20-ës si forumi kryesor i politikave ekonomike në botë.

Përpara takimit të G20, një zyrtar i lartë i FMN-së paralajmëroi për rrezikun e një ekonomie globale të fragmentuar.

“Një skenar është ai ku ne kemi ndarë blloqe që nuk tregtojnë shumë me njëri-tjetrin, që janë në standarde të ndryshme dhe kjo do të ishte një katastrofë për ekonominë globale,”– tha kryeekonomisti i FMN-së, Pierre-Olivier Gourinchas.

Rruga Press