Deklarata e Scholz se çfarë është e gatshme të ofrojë Gjermania për Ukrainën

Gjermania është e gatshme të ofrojë garanci sigurie për Ukrainën dhe vetë procedura po diskutohet brenda organizatës G7, tha kancelari gjerman Olaf Scholz.

Duke iu përgjigjur pyetjeve të deputetëve në Bundestag, ai theksoi se “çështja se si mund të organizohet është duke u shqyrtuar nga vendet anëtare të G7, si dhe cili prej anëtarëve është i gatshëm t’i japë këto garanci. Gjermania është një prej tyre”, theksoi ai.

Siç shpjegoi i pari i qeverisë gjermane, garancitë e sigurisë për Ukrainën nuk mund të jenë analoge me dispozitat e nenit të Traktatit të Atlantikut të Veriut për mbrojtjen kolektive të NATO-s, raporton focus.de.

Ato duhet të përshtaten sipas situatës specifike. Scholz shtoi se kjo temë është duke u diskutuar me Kievin, por se “është larg të qenit një proces i përfunduar”.

Përveç Gjermanisë, në organizatën G7 bëjnë pjesë edhe Italia, Japonia, Franca, Shtetet e Bashkuara të Amerikës, Britania e Madhe dhe Kanadaja.

Ndryshe, Rusia ka vazhduar edhe sot me sulmet drejt caqeve të ndryshme në shtetin ukrainas.

Rruga Press