Borxhi i sigurimeve shoqërore, rreth 17.7 miliardë lekë detyrime, rrezik për skemën e pensioneve

Thellohet borxhi i sigurimeve shoqërore, duke rrezikuar që shumë nga ata që punojnë sot të mos marrin pension kur të arrijnë moshën. Të dhënat nga Drejtoria e Përgjithshme e Tatimeve bëjnë të ditur se stoku për sigurimet e papaguara shoqërore arriti në fund të vitit 2021 në rreth 17.7 miliardë lekë, duke pësuar një rritje me mbi 700 milionë lekë kundrejt një viti më parë.

Ndërsa që prej vitit 2018, borxhi ndaj sigurimeve është zgjeruar me rreth 3.9 miliardë lekë ose 28.8 për qind.

Në kushtet e mospagesës së sigurimeve buxheti i shtetit duhet të subvencionojë skemën e pensioneve për të kryer pagesat për përfituesit aktualë. Të dhënat nga Ministria e Financave tregojnë se gjatë vitit 2021 për financimin e skemës publike të pensioneve u dhanë nga buxheti 53 miliardë lekë, ose 5% më shumë se një vit më parë.

Përveç keqmenaxhimit, borxhet e krijuara nga mospagesa e sigurimeve shoqërore tregojnë edhe për vështirësitë që po has biznesi dhe jo vetëm. Sipas të dhënave zyrtare, 94 për qind e këtyre detyrimeve i takojnë sektorit privat dhe kryesisht kompanive të mëdha, ndërsa 6% të borxhit e zotërojnë entet publike.

Rruga Press