Blinkeni e quan të panevojshme vendosjen e trupave ruse në Kazakistan

Sekretari amerikan i Shtetit Antony Blinken ka vënë në pikëpyetje vendimin e Kazakistanit për të kërkuar ndihmë ushtarake ruse, për t’u marrë me një valë të vazhdueshme trazirash të dhunshme.

Dhjetëra njerëz janë vrarë në protestat e shkaktuara nga rritja e çmimit të karburantit, por Blinken ka thënë se SHBA-ja beson se qeveria e Kazakistanit mund të merret me protestat vetë.

Ai u tha gazetarëve se ishte e paqartë pse po ndodhte dislokimi. Pjesa e parë prej rreth 2,500 trupave të drejtuara nga Rusia kanë mbërritur në Kazakistan.

Zyrtarët në Moskë kanë theksuar se vendosja e forcave të saj nën Organizatën e Traktatit të Sigurisë Kolektive (CSTO), një aleancë ushtarake euroaziatike e pesë ish-republikave sovjetike dhe Rusisë, është e përkohshme.

Presidenti Kassym-Jomart Tokayev bëri kërkesën për ndihmë pasi protestuesit sulmuan zyrën e kryetarit të bashkisë në qytetin më të madh të Kazakistanit, Almaty, dhe pushtuan aeroportin e qytetit.

Por, duke iu drejtuar gazetarëve në një konferencë të Departamentit të Shtetit, Blinken paralajmëroi se “një mësim i historisë së fundit është se kur rusët janë në shtëpinë tuaj, ndonjëherë është shumë e vështirë t’i detyrosh ata të largohen”.

“Më duket se autoritetet dhe qeveria kazake sigurisht që kanë kapacitetin për t’u marrë me protestat në mënyrë të përshtatshme për ta bërë këtë në një mënyrë që respekton të drejtat e protestuesve duke ruajtur ligjin dhe rendin. Pra, nuk është e qartë pse ata ndjejnë nevojën për ndonjë ndihmë nga jashtë. Kështu që ne po përpiqemi të mësojmë më shumë rreth saj”, ka thënë Blinken.

Ndërkohë, SHBA-ja ka autorizuar largimin e personelit jo thelbësor nga konsullata e saj në Almaty për shkak të shqetësimeve për sigurinë për protestat e vazhdueshme.

Disa njësi parashutiste ruse kanë mbërritur tashmë në Kazakistan dhe të premten ndihmuan forcat kazakistane në rimarrjen e aeroportit nga protestuesit.

Trupat kazakistane kanë ndërmarrë gjithashtu veprime të forta për të rifituar kontrollin në Almaty. Të enjten, mediat lokale publikoi video që tregonin trupat qeveritare duke hapur zjarr ndaj protestuesve.

Rruga Press