BE jep 6.3 mln euro për plehrat e Kukësit, Hasit e Tropojës

Bashkitë Kukës, Has e Tropojë do të përfitojnë nga një projekt prej 6.3 milion eurosh të Bashkimit Europian për menaxhimin e integruar të mbetjeve.

Vend depozitimi do ndërtohet në Kukës dhe, sipas është parashikuar të funksionojë në përputhje me legjislacionin shqiptar dhe atë të BE-së.

Kjo zonë e menaxhimit do grumbullojë rreth 6500 ton në vit deri në 12-mijë ton mbetje në vit, me një sasi mesatare vjetore prej rreth 8-mijë ton në vit.

Duke filluar nga 2021 dhe gjatë periudhës së planifikuar deri në 2033, parashikohet që aty të ndahen rreth 30 mijë ton material i riciklueshëm duke shmangur depozitimin fundor.

Shërbimi i pastrimit dhe grumbullimit të mbetjeve ka qenë dhe vazhdon të mbetet një problem madhor, i shumë bashkive në të gjithë vendin.

Pak kohë më parë ambasadori i BE Luigi Soreca vizitoi  Bashkinë e  Kukësit ku njoftoi se ky rajon është përzgjedhur së bashku me 15 bashki të tjera  të vendit nga BE për disa investime të reja të cilat kanë në qendër mjedisin.