BE-ja i kundërpërgjigjet Trumpit: Brukseli kërcënon me kundërmasa për shkak të tarifave

Bashkimi Evropian paralajmëroi sot se mund të përshpejtojë tarifat hakmarrëse mbi mallrat amerikane nëse Presidenti i SHBA-së, Donald Trump, zbaton kërcënimin e tij të fundit për të vendosur tarifa prej 50% mbi importet e çelikut dhe aluminit.

Komisioni Evropian njoftoi se “ndjen keqardhje të thellë” për vendimin e Trump për të rritur tarifat nga 25 përqind e planifikuar në 50 përqind, duke vlerësuar se një veprim i tillë dëmton negociatat.

Zëdhënësi i KE-së, Olof Gill, tha sot se të gjitha kundërmasat e planifikuara mund të aktivizohen automatikisht më 14 korrik ose më herët “nëse rrethanat e kërkojnë këtë”.

Sipas tij, qëllimi i BE-së mbetet një zgjidhje e negociuar, por Unioni “nuk do të hezitojë të mbrojë punëtorët, konsumatorët dhe industrinë e tij”, raporton “Bloomberg”.

Komisioneri Evropian i Tregtisë, Maros Šefčovič, do të takohet këtë javë me Përfaqësuesin Amerikan të Tregtisë, Jamieson Greer, në Paris, ndërsa delegacioni teknik i Komisionit Evropian është tashmë në rrugë për në Uashington. Qëllimi është të arrihet një zgjidhje kompromisi deri më 9 korrik, afati i fundit që Trump ka vendosur për vendosjen e tarifave të gjera për pothuajse të gjitha importet e BE-së.

Pala evropiane do të përqendrohet në sektorë të tillë si gjysmëpërçuesit dhe industria farmaceutike, me një përpjekje për të zvogëluar barrierat rregullatore dhe fiskale, duke përfshirë zbatimin e TVSH-së për importet nga SHBA-ja.

Deficiti tregtar i Shteteve të Bashkuara të Amerikës me Bashkimin Evropian është dyfishuar që nga fillimi i vitit, gjë që mund t’i ndërlikojë më tej negociatat midis Uashingtonit dhe Brukselit, shton agjencia e New Yorkut.

Rruga Press