BE-ja heton aplikacionet, Snapchat dhe Youtube për ndikimin tek fëmijët

Komisioni Evropian po heton dy platforma dhe dy dyqane aplikacionesh në lidhje me pajtueshmërinë e tyre me rregulloret digjitale të BE-së të hartuara për të mbrojtur të miturit.

Komisioni u ka dërguar kërkesa për informacion Snapchat, YouTube, Apple Store dhe Google Play se si i mbrojnë fëmijët në platformat e tyre sipas Aktit të Shërbimeve Digjitale, tha të premten në Danimarkë, Zëvendëspresidentja Ekzekutive e Komisionit, Henna Virkkunen.

Të katërta janë përcaktuar si Platforma Shumë të Mëdha Online sipas rregullores sepse kanë më shumë se 45 milionë përdorues në Bashkimin Evropian, kështu që duhet të ndjekin dispozita të rrepta për vlerësimin e rrezikut dhe zbutjen e tij.

Kërkesat janë një hap i parë në procesin e zbatimit — nëse Komisioni dyshon për një shkelje pasi platformat të përgjigjen, ai mund të hapë hetime zyrtare.

Nëse zbulohet se kompanitë kanë shkelur rregulloren, ato mund të gjobiten deri në 6 përqind të të ardhurave të tyre vjetore globale.

Virkkunen nuk pranoi të jepte detaje të mëtejshme mbi kërkesat në këtë kohë.

Ministrat e BE-së janë mbledhur në Horsens të Danimarkës për të diskutuar mbrojtjen e fëmijëve në internet, një përparësi kryesore për Kopenhagenin dhe disa vende të tjera.

Ekzekutivi i BE-së tashmë ka hapur hetime të DSA-së mbi mbrojtjen e të miturve, duke hetuar platformat kryesore pornografike, si dhe Meta dhe TikTok./ Politico.

Rruga Press