Banka Qendrore e SHBA-së rrit normat e interesit pavarësisht trazirave në sektorin bankar

Banka Qendrore e SHBA ka rritur sërish normat e interesit pavarësisht frikës se masa mund të shtojë trazirat financiare pas një vargu dështimesh bankare. Rezerva Federale rriti normën bazë me 0.25 pikë përqindjeje dhe tha se më shumë veprime mund të ishin të përshtatshme pasi çmimet e konsumit vazhdojnë të rriten.

Fed ka rritur kostot e huamarrjes në përpjekje për të ngadalësuar ekonominë dhe për të lehtësuar presionet që rrisin çmimet. Rritja e mprehtë e normave ka sjellë tendosje në sistemin bankar. Dy banka amerikane, Silicon Valley Bank dhe Signature Bank, falimentuan këtë muaj për shkak të problemeve të shkaktuara nga normat e larta të interesit.

Por autoritetet anembanë botës kanë thënë se nuk mendojnë se dështimet kërcënojnë stabilitetin financiar të përhapur dhe nuk duhet të shpërqendrohen nga përpjekjet për të vënë nën kontroll inflacionin. Javën e kaluar, Banka Qendrore Evropiane rriti me 0.5 pikë përqindje normën bazë të interesit.

Banka e Anglisë do të marrë vendimin e saj për normën e interesit të enjten, një ditë pasi shifrat zyrtare treguan se inflacioni u rrit papritur në shkurt në 10.4%.

Rruga Press