Banka Botërore dhe BQK riafirmojnë angazhimin për projekte strategjike në Kosovë
Guvernatori i Bankës Qendrore të Republikës së Kosovës (BQK), Ahmet Ismaili, së bashku me zëvendësguvernatoren Shileku-Shala dhe bashkëpunëtorët e tij, zhvilloi një takim njoftues me drejtoreshën e re të Bankës Botërore për Kosovë, Carole Megevand, dhe ekipin e saj.
Gjatë takimit, Guvernatori Ismaili e uroi Megevand për detyrën e re dhe i dëshiroi suksese në avancimin e projekteve dhe reformave të Bankës Botërore në mbështetje të ekonomisë së Kosovës. Ai e informoi atë për zhvillimet më të fundit në sektorin financiar dhe progresin e reformave të ndërmarra nga BQK-ja, me synim nxitjen e rritjes së qëndrueshme ekonomike dhe forcimin e sistemit financiar.
Diskutimet u fokusuan në situatën aktuale të sektorit financiar, bashkëpunimin e vazhdueshëm mes dy institucioneve dhe programet e reja të Bankës Botërore për fuqizimin e sektorit financiar, përfshirë asistencat teknike të dedikuara për BQK-në.
Ismaili shprehu mirënjohje për mbështetjen e vazhdueshme të Bankës Botërore, duke theksuar se ky bashkëpunim është kyç për arritjen e objektivave strategjike të BQK-së, veçanërisht në reformimin ligjor dhe rregullativ, digjitalizim, kapitalizimin e sektorit financiar, rritjen e qëndrueshmërisë financiare, anëtarësimin në SEPA dhe zbatimin e agjendës së gjelbër.
Megevand vlerësoi progresin e Kosovës në harmonizimin e kornizës ligjore dhe rregullative me standardet e Bashkimit Evropian, ndërsa Ismaili e informoi për përgatitjet dhe sfidat në procesin e aplikimit për anëtarësim në Zonën Unike të Pagesave në Euro (SEPA).
Guvernatori gjithashtu theksoi rëndësinë e projektit rajonal të Bankës Botërore për modernizimin e sistemit të pagesave, veçanërisht zhvillimin e pagesave të shpejta (Instant Payments) përmes Bankës Qendrore të Italisë dhe lidhjen e tyre me sistemet e pagesave të BE-së dhe Bankës Qendrore Evropiane, pas anëtarësimit në SEPA.
Të dyja palët riafirmuan angazhimin për të vazhduar bashkëpunimin e ngushtë, duke vlerësuar rezultatet e arritura deri më tani në projektet e përbashkëta.
Rruga Press