Austria do ta thyejë neutralitetin pas 60 vjetëve, për t’i bërë thirrje Rusisë ta ndalë luftën

Në një mesazh të përbashkët publik që do të transmetohet këtë pasdite, presidenti dhe kancelari i Austrisë – një nga vendet evropiane më simpatike ndaj Rusisë – do të thyejnë 60 vjet neutralitet zyrtar për t’i thënë Vladimir Putinit se “mjaft është mjaft”.

“Tërhiqni trupat tuaja. Jepini fund gjakderdhjes. Është koha për t’u rikthyer në tryezën e bisedimeve”, do të thonë Alexander Van der Bellen dhe Karl Nehammer.

Austria – e cila nuk është anëtare e NATO-s – ka statusin e “neutralitetit të përhershëm” të shkruar në kushtetutën e saj. Që nga fillimi i Luftës së Ftohtë, qeveritë e saj e kanë parë veten si një urë diplomatike midis Rusisë dhe Evropës.

Austria është shtëpia e shumë shtetasve rusë dhe ka disa nga lidhjet më të forta të biznesit të çdo shteti evropian me Moskën. Vjena është gjithashtu një nga bazat më të mëdha për operacionet e inteligjencës ruse jashtë territorit rus.

Traktati shtetëror austriak i vitit 1955, i cili i dha Austrisë pavarësinë e saj nga okupimi sovjetik dhe aleat, deklaron mos-angazhimin e përhershëm të vendit dhe premton mirëmbajtjen e një memoriali të madh të përhershëm të luftës ruse në Vjenën qendrore.

“Mesazhi [jonë] për popullin e Ukrainës – për ata që po luftojnë në rrugë, ata që janë fshehur në shtëpitë e tyre ose nën tokë, ata që po ikin nga atdheu i tyre – vjen nga zemra: ne qëndrojmë në anën tuaj”, do të thuhet në fjalimin e tyre.

Një zyrtar i kancelarisë tha se mesazhi do të transmetohet në televizionin ukrainas këtë pasdite, si dhe në të gjitha llogaritë e qeverisë austriake dhe diplomatike të mediave sociale.

Rruga Press