Qeveria Kurti nuk gabon në hapa/ QUINT-i ishte në dijeni se Kosova do t’i vendoste Serbisë reciprocitet për letërnjoftim
Qeveria e Kosovës e ka njoftuar paraprakisht QUINT-in dhe të dërguarin e posaçëm të BE-së për dialogun, Miroslav Lajçak, lidhur me vendimin për reciprocitet ndaj Serbisë për letërnjoftim, ka bërë të ditur të enjten, Përparim Kryeziu, zëdhënës i Qeverisë së Kosovës.
Kryeziu ka thënë për KOHËN se në fillim të kësaj jave, është mbajtur takimin me përfaqësuesit e këtyre shteteve, të cilave u është kumtuar vendimi.
“Ne mbetemi të përkushtuar për një dialog parimor dhe angazhohemi për arritjen një marrëveshje ligjërisht të obligueshme që në qendër ka njohjen reciproke. Vendimi i djeshëm i Qeverisë së Republikës së Kosovës në lidhje tabelat e veturave dhe letërnjoftimet është një vendim proporcional për të vendosur rend dhe ligj. Ne kemi dëshmuar gatishmërinë dhe konstruktivitetin e duhur për arritjen e një marrëveshje të përhershme për çështjen e targave, dhe tashmë ka dëshmi të fortë që një gjë është pamundësuar për shkak të destruktivitet nga pala e serbe. Përveç z. Lajçak, për propozimin dhe vendimin tonë kanë qenë të njoftuar edhe shtetet e QUINT-it me të cilët, sikurse edhe kemi njoftuar nëpërmjet një komunikate për medie, kemi mbajtur një takim në fillim të kësaj jave”, ka thënë Kryeziu.
Qeveria e Kosovës ka vendosur reciprocitet për hyrje të shtetasve të Serbisë në Kosovë. Në mbledhjen e mbajtur të mërkurën, Qeveria Kurti vendosi që aplikojë të njëjtën masë, sikur Beogradi zyrtar, që nuk pranon letërnjoftimin, por në hyrje kosovarët i pajisë me një letër që zëvendëson dokumentet e identifikimit.
“Miratimin e kabinetit qeveritar e mori edhe vendimi, sipas të cilit çdo person që paraqitet për kalim të kufirit shtetëror me dokument të identifikimit personal të lëshuar nga autoritetet e Serbisë, të pajiset në pikë-kalimet kufitare me një fletë-deklarim që përkohësisht e zëvendëson përdorimin e dokumentit të tillë. Fletë-deklarimi do të krijojë bazë për qarkullim në territorin e Republikës së Kosovës dhe për shfrytëzim brenda institucioneve shtetërore”, thuhej në njoftimin e Kryeministrisë.
Vendimi i Qeverisë nxiti reagime të mëdha në Beograd, duke thënë se kjo është një “thirrje për konflikt të madh”.
Rruga Press