Asetet ruse për Ukrainën, vendet anëtare të BE bien dakord në parim për konfiskimin

Diplomatët evropianë ranë dakord për të përdorur të ardhurat nga asetet e ngrira të shtetit rus për të ndihmuar Ukrainën.

Në këtë mënyrë ata i hapin rrugë marrjes nga Ukraina të rreth 3 miliardë eurove për blerje armësh dhe për procesin e rindërtimit përpara ardhjes së verës.

Që nga nisja e pushtimit rus në 2022-shin, 210 miliardë euro asete të Bankës Qendrore të Moskës, të depozituara kryesisht në Belgjikë, kanë ngrirë në radhët e Bllokut.

Marrëveshja u arrit në parim në një takim të rregullt të përfaqësuesve të vendeve anëtare, bëhet e ditur në një postim në rrjetin “X” nga presidenca belge e Këshillit Evropian.

Brukseli prej kohësh ka shprehur interesin e tij për të përdorur këto të ardhura, rreth 3 miliardë euro në vit, për koston e rindërtimit të Ukrainës dhe madje ka zgjatur planet e tij për të mbuluar shpenzimet ushtarake për Kievin.

Plani, që gjithashtu ka mbështetjen e grupit të 7 vendeve më të industrializuara në botë, vjen në një kohë kur Ukraina shpreson të ndryshojë drejtimin e erës së luftës falë ndihmës ushtarake prej 89 miliardë eurosh të aprovuar së fundmi nga Kongresi amerikan.

Por ministrat ukrainas kanë deklaruar se Brukseli duhet të shkojë përtej, duke i konfiskuar tërësisht asetet e Moskës, për t’u siguruar që agresori të paguajë për koston e luftës.

Por zyrtarët në vendet e BE-së dhe Banka Qendrore Evropiane kanë shprehur shqetësimin se një gjë e tillë mund të krijojë një precedent të padobishëm dhe të dëmtojë reputacionin e euros, si një valutë e sigurt.

Megjithatë, Brukseli ka gjasa të ndërmarrë një hap tjetër të rëndësishëm. Në paketën e 14 të sanksioneve ndaj Rusisë, e propozuar nga vendet e bllokut, përfshihet ndalimi i importeve të gazit të lëngshëm rus.

Rruga Press