Arrestohet ish-komandanti serb, dyshohet për krime lufte gjatë vitve 1998-1999 në Zveçan

May 15, 2025 User2

Prokuroria Speciale e Kosovës ka bërë të ditur se mëngjesin e së mërkurës është arrestuar M.D., shtetas serb, nën dyshimet për përfshirje në krime lufte kundër popullatës civile gjatë viteve 1998-1999 në komunën e Zveçanit.

Arrestimi është kryer me urdhër të prokurores speciale Florije Salihu-Shamolli, pas një hetimi disa mujor, në bashkëpunim me hetuesit e Krimeve të Luftës.

Lexo më shumë Prokuroria i ngren aktakuzë për falsifikim të dokumenteve zyrtare Nexhat Fazliut, teksa “gazetari” Mehmetaj tentoi ta manipulojë opinionin publik duke e shpallur “hero”

Sipas Prokurorisë, M.D. dyshohet se në cilësinë e komandantit të Njësisë së Policisë në kuadër të Ministrisë së Punëve të Brendshme të Serbisë (MUP), ka marrë pjesë në vrasje, dëbime me forcë, plaçkitje, tortura dhe rrahje sistematike të civilëve shqiptarë.

Në veçanti, ai dyshohet për përfshirje në një operacion ushtarako-policor gjatë muajit prill të vitit 1999 në fshatin Zhazhë, ku sipas hetimeve, janë vrarë shtatë civilë shqiptarë. Trupat e tyre janë gjetur më pas në varrezat e fshatit Suhodoll në komunën e Mitrovicës.

Lexo më shumë The Geopost: “Vullnetarët” rusë financojnë manastiret serbe në Kosovë

Prokuroria Speciale ka njoftuar se brenda afateve të përcaktuara ligjore, sipas Kodit të Procedurës Penale, do të paraqesë kërkesën për caktimin e masës së paraburgimit ndaj të dyshuarit në Gjykatën Themelore të Prishtinës.

Rruga Press