Ambasada amerikane pëlqen postimin ku Vuçiqi thotë se 9 shtete e kanë tërhequr njohjen e Kosovës

Profili në Twitter i Ambasadës së Shteteve të Bashkuara të Amerikës në Prishtinë ka pëlqyer një postim në të cilin presidenti i Serbisë, Aleksandar Vuçiq, ka thënë se nëntë shtete e kanë tërhequr njohjen e Kosovës. Një ditë më pas, Ambasada e ka hequr pëlqimin. 

“Vuçiq rendit nëntë shtetet që tërhoqën njohjen e Kosovës së vetëshpallur”, është titulli i lajmit të shpërndarë nga “Vaseljenska TV” të cilin e ka pëlqyer Ambasada amerikane në Prishtinë.

Lajmi është i publikuar në orët e mbrëmjes të së mërkurës.

Reagim për këtë pati deputeti i Lëvizjes Vetëvendosje, Armend Muja, i cili në hapësirën e komenteve ia ka kujtuar Ambasadës se çfarë thotë postimi të cilin ata e kanë pëlqyer.

Pas reagimeve, Ambasada amerikane mëngjesin e së enjtes e ka hequr pëlqimin në postim. 

Vuçiq në një konferencë për media ka thënë se nëntë shtete – Somalia, Burkina Faso, Gaboni, Eswatini, Libia, Guinea, Barbuda, Saint Lucia, Maldivet – e kanë tërhequr njohjen e Kosovës, duke shtuar se po presin edhe të dhjetin.

Ambasada e SHBA-së sqarohet për pëlqimin e lajmit për çnjohje: Nuk është bërë qëllimisht

Ambasada e SHBA-së në Kosovë ka dhënë sqarim lidhur me pëlqimin që i ka bërë një lajmi në Twitter, në të cilin presidenti serb, Aleksandar Vuçiq ka thënë se nëntë shtete e kanë tërhequr njohjen ndaj Kosovës.

Përmes një emaili dërguar nga ambasada në të cilin citohet një zëdhënëse, Jud Katherine, thuhet se ai lajm nuk është pëlqyer qëllimisht.

Gjithashtu thuhet se janë duke e shqyrtuar situatën për të përcaktuar se çfarë ka ndodhur.

“Llogaria zyrtare në Twitter e Ambasadës së SHBA-së nuk ka ‘pëlqyer’ qëllimisht asnjë postim në Twitter gjatë 24 orëve të fundit. Ne po shqyrtojmë situatën për të përcaktuar se çfarë ka ndodhur. Siç u theksua më parë: kur kemi një pozicion për të artikuluar, ne e bëjmë këtë nëpërmjet deklaratave zyrtare – jo nga një ‘like’ e mediave sociale”, thuhet në deklaratë.

Rruga Press