Adnan Rrustemi: Themelimi i Listës Serbe u lejua nga qeveria e PDK-së, pasojat po i vuajmë sot

Deputeti i Lëvizjes Vetëvendosje, Adnan Rrustemi, ka rikujtuar opinionin publik për rolin që ka luajtur qeveria e atëhershme e PDK-së në krijimin dhe certifikimin e Listës Serbe, në kuadër të dialogut me Serbinë në vitin 2013. Përmes një postimi, Rrustemi ka ndarë përvojën e tij si anëtar i Komisionit Qendror të Zgjedhjeve në atë kohë, duke denoncuar ndërhyrje të drejtpërdrejta që komprometuan rendin kushtetues të Kosovës.

“Sapo erdhi një telefonatë nga Brukseli – aty ku dialogonte qeveria me Daçiqin – dhe u njoftuam për themelimin e Listës Serbe”, shkruan Rrustemi. Sipas tij, menjëherë më pas kishte nisur një proces përshtatjeje të dokumentacionit zgjedhor për të mundësuar certifikimin e kësaj liste për zgjedhjet lokale të vitit 2013.

Ai thotë se u hoqën simbolet shtetërore të Republikës së Kosovës nga formularët dhe fletëvotimet, u përbënë komisione në favor të Listës Serbe dhe madje u dërguan ekipe në Serbi për të mbledhur vota për të.

Duke analizuar situatën 12 vite më vonë, Rrustemi thotë se pasojat janë të dukshme: “U shkatërruan nismat politike të serbëve që pranonin shtetin e Kosovës.” Ai gjithashtu kritikon mungesën e reflektimit nga Partia Demokratike e Kosovës: “Asnjëherë nuk kemi pa distancim a pendim të PDK-së nga ky veprim.”

Në fund, Rrustemi i reagon edhe deklaratës së kryetarit aktual të PDK-së që kishte thënë: “…e kanë Listën Serbe”, duke shtuar se kjo listë është trashëgimi e PDK-së për Kosovën dhe se edhe në opozitë, partia vazhdon të mbajë lidhje të hapura me të.

Rruga Press