Ekspozita në Sarajevë dokumenton rreziqet e “Rrugës së snajperëve” gjatë luftës
Fotografi Paul Lowe po prezanton një ekspozitë multimediale të mbështetur nga BIRN të titulluar “Kujdes, snajper”, duke dokumentuar përvojat e njerëzve u përballën me rreziqet e “Rrugës së Snajperëve” të Sarajevës gjatë rrethimit 1992-1995.
“Kujdes, snajper”, një ekspozitë multimediale që dokumenton rrethimin e kryeqytetit boshnjak gjatë kohës së luftës përmes fotografive, hulumtimit në materialin arkivor të Gjykatës së Hagës, dëshmive të dëshmitarëve dhe modelimit 3D, hapet në Muzeun Historik të Bosnjës dhe Hercegovinës në Sarajevë të enjten në mbrëmje.
Ekspozita bazohet në hulumtimin e kryer nga Paul Lowe, një fotograf i vlerësuar me çmime me bazë në Sarajevë, i cili raportoi luftën në Bosnje dhe puna e të cilit është botuar nga Time, Newsweek, Life dhe The Sunday Times Magazine, ndër të tjera.
Ekspozita rindërton historikisht dhe gjeografikisht zonën në Sarajevë të njohur gjatë rrethimit të viteve 1992-1995 si Rruga e Snajperëve – emri informal i rrugës Zmaja od Bosne dhe Bulevardit Mesa Selimovic, bulevardit kryesor në Sarajevë, i cili gjatë luftës në Bosnje ishte i mbushur me poste snajperësh, duke e bërë të rrezikshëm kalimin e civilëve.
Malet që rrethojnë qytetin u përdorën gjithashtu për pozicione snajperësh nga Ushtria Serbe e Bosnjës.
“Paul Lowe fotografoi luftërat jugosllave që në fillim. Ai ishte këtu, në Sarajevë, gjatë rrethimit dhe pa vetë personalisht se çfarë po ndodhte, jo vetëm në Rrugën e Snajperëve, por në Bosnje dhe Hercegovinë në përgjithësi. Ai qëndroi më pas dhe pa edhe pasojat e luftës”, tha drejtoresha rajonale e BIRN, Marija Ristic.
Ekspozita nuk do të shfaqë vetëm punën e Lowe, por edhe imazhe nga fotografë të tjerë si Ron Haviv, Enric Marti, Rikard Larma dhe Gervasio Sanchez.
“Lowe ka përdorur fotografinë dhe fotografitë e tij nga të tjerët, por edhe dokumente, instalacione artistike dhe teknologji për të krijuar një rrëfim bindës të ngjarjeve. Nëpërmjet këtij kombinimi të gazetarisë, gjetjeve të gjykatës, dëshmive të dëshmitarëve, modelimit 3D dhe artit, ne shpresojmë të sjellim teknika të reja të tregimit për publikun, jo vetëm në Sarajevë, por edhe gjetkë në rajon”, tha Ristic.
Ekspozita do të hapet më 18 nëntor për të përkujtuar përvjetorin e vdekjes së Nermin Divic, një djalë i vrarë nga një snajper në të njëjtën ditë në 1994.
Ajo po organizohet si pjesë e skemës së granteve së Drejtësisë Tranzicionale të BIRN në Ballkan, e cila synon të inkurajojë profesionistë në fusha të ndryshme që të eksplorojnë arkivat e gjykatave që merren me gjyqet e krimeve të luftës në Ballkan.
Ajo mbështetet gjithashtu nga Qendra Hulumtuese e Fotografisë dhe Arkivit, Universiteti i Arteve në Londër dhe Fondacioni VII.
“Kujdes, snajper” do të ekspozohet në Muzeun Historik të Bosnjë dhe Hercegovinës në Sarajevë deri në pranverën e vitit të ardhshëm./balkan/
RrugaPress