Zyrtare/ Xavi Hernadez emërohet trajner i Barcelonës, ja detajet e kontratës

Tashmë është zyrtare. Pas disa ditësh spekulimesh dhe një njoftimi nga Joan Laporta, Xavi më në fund është emëruar trajneri i ri i Barcelonës, ​​siç njoftoi klubi katalanas në orët e para të mëngjesit të sotëm.

Trajneri 41-vjeçar ka firmosur një kontratë deri në vitin 2024 me klubin blaugran. “Barcelona ka arritur marrëveshjen me Xavi Hernandez për t’u bërë trajner i ekipit të parë për pjesën e mbetur të sezonit aktual dhe dy sezone shtesë. Xavi Hernández, një produkt i skuadrës së të rinjve të Barçës, është larguar nga klubi i tij aktual Al-Sadd i Katarit pas bisedimeve me pronarët e klubit ditët e fundit. “

Pas një dite të gjatë negociatash mes Al-Sadd, Barcelona dhe vetë Xavi, të gjitha palët më në fund kanë arritur marrëveshjen. Xavi mbërrin në Barcelonë këtë të shtunë dhe prezantimi i trajnerit të ri të blaugranëve  do të bëhet të hënën më 8 nëntor në Camp Nou. Një ëndërr që bëhet realitet për atë që tashmë deklaroi në verën e 2020: “Ëndrra ime është të jem trajner i Barçës dhe të kthehem te Barça për të pasur sukses” . Si trajner i Al-Sadd, pasi kishte varur këpucët në vitin 2019, Xavi fitoi Superkupën e Katarit dhe gjithashtu udhëhoqi ekipin në gjysmëfinalet e Ligës së Kampionëve AFC. Në total, Xavi fitoi në Katar  shtatë trofe të ndryshëm, duke përfshirë tre në 2021, shton Barça. Lajm që duhet të gëzojë mbështetësit katalan.

Sipas mediave spanjolle, Barcelona dhe Xavi do t’i paguajnë klubit të Al Sadd 5 milionë euro, shumë të cilën do ta ndajnë së bashku.

Barcelona dhe Xavi do t’i paguajnë nga 2.5 milionë euro secili Al Sadd-it, për t’i dhënë fund kësaj telenovele.

Barça do t’ia japë të “thata” paratë, ndërsa Xavi do t’i kthejë paratë përmes bonuseve dhe klauzolave ​​të ndryshme në kontratën me klubin nga Katari, pra si ambasador i Kupës së Botës që do të luhet vitin e ardhshëm në vendin aziatik.

Rruga Press