Ndryshimet klimatike, kryeministri i Gjeorgjisë jep alarmin: Kaukazi ka humbur tashmë 40 për qind të akullnajave të tij

Kryeministri i Gjeorgjisë, Irakli Garibashvili ka mbajtur një fjalim në Konferencën e COP26 në Glasgow, Mbretëria e Bashkuar, duke prekur “rëndësinë kritike” të COP26 për Gjeorgjinë.

“Kaukazi – një tokë e bukur malesh, akullnajash dhe lumenjsh – ka humbur tashmë 40 për qind të akullnajave të tij. Vetëm gjatë dy dekadave të fundit, shpejtësia e humbjes së akullnajave në Gjeorgjinë lindore ka tejkaluar parashikimet nga fundi i shekullit të njëzetë”, ka thënë ai.

Duke bërë thirrje për ngritjen e sfidave dhe rritjen e angazhimit publik për të zhvilluar shoqëri më produktive dhe elastike, kryeministri Garibashvili tha se “investimet në energjinë e pastër, bujqësinë e zgjuar ndaj klimës dhe kapacitetin e rritur adaptues përfaqësojnë hapa konkretë për reduktimin e emetimeve dhe përgatitjen e shoqërive tona për ndikimet e pashmangshme të ndryshimeve klimatike”.

“Në këtë frymë, Gjeorgjia është zotuar që deri në vitin 2030 të zvogëlojë emetimet e gazrave serrë me më shumë se gjysmën në krahasim me nivelet e vitit 1990 dhe të thellojë të kuptuarit e kapacitetit të saj adaptues ndaj ndryshimeve klimatike përmes partneriteteve ndërkombëtare”, tha kryeministri gjeorgjian në fjalën e tij.

Ai theksoi më tej se qeveria e Gjeorgjisë ka “një plan zhvillimi me një vizion të qartë për vitin 2030 që përputhet në mënyrë të përkryer me Axhendën 2030 për Zhvillim të Qëndrueshëm”.

Duke u bërë thirrje të gjithëve që të veprojnë, kryeministri Garibashvili tha gjithashtu se ‘nga qytetet e vogla dhe fshatrat në zonat e mëdha urbane, të gjithë duhet t’i zotojmë popullatës së re sot dhe brezave të ardhshëm, se ruajtja e planetit tonë është e panegociueshme’.

Rruga Press