Tre gazetarë në Finlandë akuzohen për zbulimin e sekreteve të Agjencisë së Inteligjencës VKoeL
Tre gazetarë të medies më të madhe në Finlandë, Helsingin Sanomat janë akuzuar nga zëvendësprokurori i Shtetit për raportin e tyre mbi një çështje të Agjencisë vendore të Inteligjencës e njohur si VKoeL.
Derisa mjetet për të marrë informacionin nuk ishin të paligjshme, prokurori pretendon se historia e publikuar në dhjetor të 2017-së, cenonte sigurinë e shtetit.
Nëse shpallen fajtorë, gazetarët përballen me një dënim nga katër muaj deri në katër vjet. Dy redaktorë të tjerë të kësaj medie janë objekt i hetimit, por jo të akuzuar, shkruajnë mediet e huaja.
Vendimi i Prokurorisë ka shkaktuar një protestë në mediet finlandeze dhe në mesin e juristëve.
Kryeredaktori i Helsingin Sanomat, Kaius Niemi i përshkroi akuzat si një “shok” dhe tha se ato rrezikojnë kushtet e punës së shtypit të lirë.
Gazeta e justifikoi publikimin e historisë si në interes të publikut pasi ligjet që përcaktonin dallimin e inteligjencën civile me atë ushtarake, gjatë asaj kohe ishin duke u shqyrtuar.
Sipas juristëve, çështja është e hapur për interpretim dhe mund të jetë në kundërshtim me parimet e Gjykatës Evropiane të të Drejtave të Njeriut.
Në deklaratën e saj, Unioni i Gazetarëve në Finlandë dënoi Prokurorinë duke thënë se në një demokraci perëndimore, puna gazetareske nuk mund të jetë krim.
Gjithashtu, Instituti Ndërkombëtar i Shtypit (IPI) iu referua Finlandës si një “strehë e sigurt” për lirinë e shtypit dhe u bëri thirrje “autoriteteve që të heqin sa më parë të gjitha akuzat kundër gazetarëve në këtë rast dhe të ofrojnë siguri se mbrojtja e lirisë së shtypit mbetet prioritet në Finlandë”. /Telegrafi/