“Nga ofensiva e forcave jo perëndimore në Ballkan, te demokracia në Shqipëri”, delegacioni nga Senati Amerikan takon Bashën

Kreu demokrat, Lulzim Basha, priti në një takim këtë të enjte një delegacion nga Senati Amerikan. Pas takimit, kryetari i Partisë Demokratike u shpreh se dy ishin çështjet e diskutuara, demokracia në vend dhe problemet e rajonit dhe ofensiva e forcave jo perëndimore.

“Dy janë çështjet kryesore për të cilat kemi folur me delegacionin e lartë nga Uashingtoni. Njëra ka të bëjë me demokracinë shqiptare, udhëkryqin me të cilin ndodhet, veçanërisht pas masakrës zgjedhore të 25 prillit. Roli i opozitës shqiptare në parlament dhe në bashkëpunim me të gjitha forcat e gjalla të shoqërisë shqiptare dhe me ndihmën e SHBA për të rikthyer Shqipërinë në shinat e demokracisë. Përmes një vendi që është demokratik, ku nuk shkatërrohen zgjedhjet, ku ndëshkohet politikani i korruptuar, të krijojmë një klimë investimesh nga e cila të përfitojnë shqiptarët.

Çështja e dytë, po kaq e rëndësishme, ka të bëjë me rajonin, në veçanti sa i përket situatës së provokuar nga ringjallja hegjemoniste serbe përmes proceseve si ai i Novisadit dhe nevojës për të përforcuar praninë politike amerikane për t’iu kundërvënë çdo ofensive të forcave jo perëndimore ndaj arritjeve 30 vjeçare të SHBA-vë dhe të boshtit euroatlantik për stabilitetin e paqes në Ballkan”, u shpreh Basha.

Rruga Press