Dy policë maqedonas kapen me drogë në Shqipëri, kishin kanabis nën sendilje

Dy zyrtarë të policisë maqedonas nga Sektori për Krim Kompjuterik para disa ditëve janë kapur me drogë në Shqipëri, teksa kalonin doganën për në Mal të Zi. Rasti është konfirmuar për “Klan” nga Ministria e Punëve të Brendshme, ndërsa shtojnë se kanabisi ishte i fshehur nën sendilje, por nuk bëhet me dije sasia.

Po ashtu, shtohet se dy punonjësit e Sektorit për Krim Kompjuterik për udhëtimin në Mal të Zi kanë marrë makinën zyrtare “Chrysler Voyager“ nga auto-parku i Ministrisë. Pikërisht kjo makinë u është dhënë nga Agjencia për Menaxhimin me Pronën e Konfiskuar, pasi Drejtoria e Doganave në vitin 2016 e kishte konfiskuar gjatë një aksioni për shkatërrimin e tregtisë me drogë.

Për këtë rast lëndë ka hapur Prokuroria për Ndjekjen e Krimit të Organizuar dhe Korrupsionit që duhet të konstatojë nëse versioni i MPB-së është i saktë dhe në ç’mënyrë marijuana e paketuar ka kaluar nëpër tri institucione dhe nuk është zbuluar.

Rruga Press