Haxhiu takon delegacionin e Asamblesë Parlamentare të NATO-s: Synojmë anëtarësimin

Kryetarja e Kuvendit të Kosovës, Albulena Haxhiu, ka deklaruar se për Kosovën, NATO-ja lidhet pazgjidhshmërisht me vitin 1999, kur ndërhyrja e Aleancës ishte vendimtare për t’i dhënë fund luftës, masakrave dhe spastrimit etnik nga Serbia. Këto deklarime ajo i ka bërë në takim me delegacionin e Asamblesë Parlamentare të NATO-s, të udhëhequr nga nënkryetari i Asamblesë, Alberto Losacco, dhe kryetari i Komisionit Politik, Sverre Myrli. 

Derisa ka theksuar se mirënjohja e Kosovës mbetet e palëkundur,  sipas saj, Kosova dëshiron të dëshmojë se është e gatshme të marrë më shumë përgjegjësi për paqen dhe sigurinë e përbashkët.

“Që nga viti 2024, Kuvendi i Kosovës ka statusin e anëtarit të asociuar në Asamblenë Parlamentare të NATO-s. Diskutuam për thellimin e bashkëpunimit ndërmjet komisioneve parlamentare, shkëmbimin e përvojave dhe forcimin e mbikëqyrjes në sektorin e mbrojtjes, si dhe për sigurinë e infrastrukturës kritike”, ka shkruar ajo në një postim në Facebook.

Tutje ka thënë se Kosova mbetet e përkushtuar ndaj integrimit euroatlantik, me synimin për të avancuar drejt Partneritetit për Paqe dhe anëtarësimit në NATO. 

“Në këtë rrugëtim, reformat tona dhe mbështetja e aleatëve janë thelbësore. I falënderova për vizitën, me bindjen se ky takim do të pasohet nga bashkëpunim konkret dhe i vazhdueshëm”, ka shkruar ajo.

Rruga Press