Gjashtë senatorë deklaratë kundër planit të Trumpit për blerjen e naftës nga Rusia, mes tyre katër republikanë

Një grup prej gjashtë senatorësh ka  bërë thirrje të dielën që administrata e presidentit Donald Trump ta ndryshojë “kursin” lidhur me blerjen e naftës dizel nga Rusia, në kuadër të përpjekjeve për të ulur çmimet e larta të karburanteve.

Trumpi i befasoi ligjvënësit kur njoftoi të premten në rrjetet sociale se kishte arritur një marrëveshje me presidentin rus Vladimir Putin gjatë një bisede telefonike. Ai tha se Rusia do të  furnizojë menjëherë tregun amerikan dhe atë global me më shumë se 300 mijë tonë naftë dizel, të ndjekura nga 500 mijë tonë të tjerë në nëntor dhe një milion ton “menjëherë pas kësaj”.

Rusia do të dërgojë më pas edhe tre milionë të tjerë “brenda një periudhe të shkurtër kohore”, shkroi ai.

Katër senatorë republikanë dhe dy senatorë demokratë nënshkruan deklaratën e publikuar të dielën, duke kundërshtuar marrëveshjen. Ata thanë se administrata nuk ishte konsultuar me Kongresin dhe nuk kishte paraqitur asnjë shpjegim për të justifikuar vendimin e saj, siç kërkohet me ligj.

Senatorët republikanë që nënshkruan deklaratën janë Susan Collins nga Maine, Lisa Murkowski nga Alaska, Thom Tillis nga Karolina e Veriut dhe John Curtis nga Utah.

Senatorët demokratë janë Jeanne Shaheen nga New Hampshire dhe Richard Blumenthal nga Konektikati.

Trump, ka njoftuar se është arritur një “armëpushim energjetik” mes Rusisë dhe Ukrainës, i cili hynë në fuqi “menjëherë”. Trump në postim në “Truth Social” ka thënë se të dyja palët janë dakorduar për këtë. 

“Duke filluar menjëherë, ka një armëpushim energjetik në luftën mes Rusisë dhe Ukrainës. Të dyja palët janë pajtuar. Mos e shkelni atë!” – ka shkruar Trump. 

Rusia ende nuk ka komentuar, por faqja amerikane “Axios” raporton se presidenti i Ukrainës, Volodymyr Zelensky, ka thënë se njoftimi i Trumpit “është lajm për mua”. 

Rruga Press