Artur Shehu, ndërtimet në bregdet me para droge dhe presionet politike: Mediat ndërkombëtare “bombardojnë” SPAK-un me pyetje, mes tyre Wall Street Journal e Daily Mail
Projektet e mëdha të investimeve në bregdetin shqiptar, pastrimi i parave të rrjedhura nga trafiku ndërkombëtar i kokainës dhe pavarësia e drejtësisë ndaj presioneve politike kanë kthyer Strukturën e Posaçme Kundër Korrupsionit dhe Krimit të Organizuar (SPAK) në një qendër vëmendjeje për median më prestigjioze botërore.
Sipas të dhënave të regjistrit zyrtar të kërkesave për informacion për muajin korrik, gjigantë të medias ndërkombëtare si Wall Street Journal, Daily Mail, Newsweek, Tagesspiegel dhe L’Impertinent i janë drejtuar zyrtarisht SPAK-ut me pyetje mjaft të drejtpërdrejta dhe hetuese.
Emri i Artur Shehut dhe hija mbi investimet në Sazan e Zvërnec
Në fokusin kryesor të gazetarëve të huaj është biznesmeni me bazë në Miami, Artur Shehu (i referuar në shkresat zyrtare si A.Sh.), i cili akuzohet nga SPAK se ka ngritur një perandori pasurish të paluajtshme përmes falsifikimit të pronësisë së tokave në bregdet, duke pastruar produktet e trafikimit të kokainës nga Amerika e Jugut drejt Evropës.
Wall Street Journal (SHBA): I është drejtuar SPAK-ut me kërkesë specifike për të mësuar nëse autoritetet shqiptare i janë drejtuar Interpol-it për lëshimin e një “Urdhër-Arrestimi të Kuq” (Red Notice) ndaj Artur Shehut, si dhe për të marrë dokumente gjyqësore nga dosjet e fundit hetimeve.
Daily Mail (Mbretëria e Bashkuar): Ka kërkuar koment zyrtar mbi raportimet se pasuritë e sekuestruara dhe tokat e falsifikuara nga Artur Shehu prekën zonat ku parashikohen projekte të mëdha rezortesh shumëmiliardëshe në bregdet.
Newsweek (SHBA): Ka kërkuar konfirmim nëse hetimi ndaj Artur Shehut mbetet aktiv, nëse sekuestroja prej 110 milionë eurosh mbi pasuritë e tij është ende në fuqi, si dhe nëse këto hetime ndikojnë në transaksionet e tokave në projektet e propozuara në Sazan dhe Zvërnec.
Presioni politik dhe investimet strategjike në bregdet
Interesi i medias ndërshtetërore shtrihet edhe te mbrojtja e vetë SPAK-ut nga ndërhyrjet politike dhe te projektet e tjera zhvillimore në bregdetin shqiptar:
Tagesspiegel (Gjermani): Duke iu referuar interesit të lartë publik për projektet e investimeve në Sazan dhe Zvërnec, gazeta gjermane kërkoi një intervistë të drejtpërdrejtë me prokurorin përgjegjës të çështjes.
L’Impertinent (Zvicër): Pyeti zyrtarisht SPAK-un mbi ecurinë procedurale të dosjeve të nxehta, si dhe mbi garancitë që ka institucioni për t’iu kundërvënë presioneve politike gjatë hetimeve të nivelit të lartë.
Përgjigja e SPAK: Muri i “Sekretit Hetimor”
Përballë këtij “floti” pyetjesh nga mediat më të mëdha në botë, Struktura e Posaçme ka mbajtur një qëndrim të prerë e të përmbajtur ligjor.
Për pothuajse të gjitha kërkesat e gazetarëve amerikanë, britanikë, gjermanë e zviceranë, SPAK ka dhënë përgjigjen standarde zyrtare:
“Në zbatim të kërkesave për ruajtjen e sekretit hetimor në fazën paraprake, nuk mund të bëhen me dije detaje të tjera në këtë moment. Përveç informacioneve të bëra tashmë publike përmes njoftimeve për shtyp, nuk kemi asnjë të dhënë shtesë për të ndarë.”
Afera e inceneratorëve dhe kërkimet në Belgjikë e Holandë
Përveç dosjes së bregdetit, mediat evropiane kanë kërkuar llogari edhe për çështje të tjera me karakter ndërkombëtar:
Financieele Dagblad (Holandë): U interesua për rolin e dy shtetasve holandezë të akuzuar në aferën e inceneratorit të Tiranës. SPAK iu përgjigj se dy personat janë shpallur në kërkim ndërkombëtar dhe se dosja ndaj tyre është dërguar për gjykim në GJKKO për pastrim parash dhe grup të strukturuar kriminal.
Gazet van Antwerpen (Belgjikë): Kërkoi intervistë për ekstradimin e shtetasit E.N., por SPAK e refuzoi kërkesën duke sqaruar se seanca paraprake zhvillohet me dyyer të mbyllura.
Pyetjet e shumta nga Uashingtoni, Londri, Berlini e Cyrihu dëshmojnë se hetimet e SPAK-ut mbi pronat në bregdet dhe pastrimin e parave nuk janë më thjesht një çështje e brendshme shqiptare, por një temë me mbulim e interes të lartë ndërkombëtar. /vna.al/
