Rifillon kalimi i anijeve në Ngushticën e Hormuzit

Anijet kanë nisur gradualisht të kalojnë sërish nëpër Ngushticën e Hormuzit, një nga rrugët detare më të rëndësishme për tregtinë globale të energjisë.

Presidenti amerikan, Donald Trump, deklaroi se ngushtica do të jetë “plotësisht e hapur” deri të premten, duke shtuar se anijet tashmë kanë filluar të lëvizin dhe të transportojnë naftë nga rajoni. 

Mediat iraniane konfirmuan se disa cisterna nafte dhe anije mallrash kanë kaluar nëpër zonën që deri vonë ishte prekur nga bllokadat detare.

Megjithatë, pavarësisht optimizmit të shprehur nga Uashingtoni, mbetet e paqartë se kush do të ketë kontrollin efektiv mbi këtë korridor detar strategjik. 

Agjencia shtetërore iraniane Fars raportoi se marrëveshja e arritur parashikon një kornizë ligjore sipas së cilës Ngushtica e Hormuzit do të menaxhohet bashkërisht nga Irani dhe Omani.

Ngushtica, e cila në pikën më të ngushtë ka vetëm 38 kilometra gjerësi, shërben për transportimin e rreth një të pestës së naftës dhe gazit natyror të lëngshëm në botë.

Instituti për Studimin e Luftës (ISW) në Uashington vlerësoi se SHBA-ja dhe Irani po japin interpretime të ndryshme të marrëveshjes, duke e bërë të vështirë përcaktimin e versionit përfundimtar të saj. Sipas analizës së institutit, nëse interpretohet sipas qëndrimit iranian, marrëveshja mund të përbëjë fitore të rëndësishme strategjike për Teheranin.

Ndërkohë, marrëveshja përfshin edhe çështje të tjera të rëndësishme, përfshirë lirimin e aseteve të ngrira iraniane jashtë vendit, negociatat për programin bërthamor të Iranit dhe përfshirjen e inspektorëve amerikanë dhe të Agjencisë Ndërkombëtare për Energjinë Atomike (IAEA) në procesin e monitorimit.

Edhe pse të dyja palët e kanë paraqitur marrëveshjen si një hap drejt paqes, zyrtarët iranianë kanë shprehur kujdes, duke kujtuar historinë e marrëveshjeve të mëparshme që sipas tyre nuk janë respektuar.

Rruga Press