ShBA-ja ndalon tre anije cisternë nafte të Iranit në ujërat aziatike
Forcat amerikane kanë kapur tre anije cisternë me flamur iranian në ujërat aziatike, duke i devijuar ato nga rrugët e tyre pranë Indisë, Malajzisë dhe Sri Lankës, thanë burime të industrisë së transportit detar dhe sigurisë detare.
Uashingtoni ka vendosur një bllokadë detare ndaj tregtisë iraniane, ndërsa Irani ka nisur sulme ndaj anijeve për t’i penguar ato të kalojnë nëpër Ngushticën e Hormuzit, në hyrje të Gjirit Persik për shkak të situatës në Lindjen e Mesme.
Pothuajse dy muaj pasi Shtetet e Bashkuara dhe Izraeli filluan operacionet ushtarake kundër Iranit, nuk ka shenja të ndonjë përparimi të konsiderueshëm drejt rifillimit të bisedimeve të paqes, pavarësisht një armëpushimi të brishtë.
Mbyllja e Ngushticës ka shkaktuar ndërprerje të mëdha në tregun global të energjisë, duke prekur rreth një të pestën e furnizimeve globale me naftë dhe gaz dhe duke çuar në një krizë ndërkombëtare energjitike.
Në ditët e fundit, forcat amerikane kanë sekuestruar një anije mallrash iraniane dhe një anije cisternë, ndërsa Teherani tha se kishte sekuestruar dy anije kontejnerësh që përpiqeshin të dilnin nga Gjiri Persik përmes Ngushticës së Hormuzit, pasi hapën zjarr ndaj tyre, dhe një anije tjetër.
Sipas dy burimeve të transportit detar amerikan dhe indian, si dhe dy burimeve perëndimore të sigurisë detare, Shtetet e Bashkuara kanë devijuar gjithashtu të paktën tre anije cisternë iraniane në ditët e fundit.
Anijet e kapura përfshinin supertankerin Dorena , të ngarkuar plotësisht me rreth dy milion fuçi naftë bruto, i cili u vu re tre ditë më parë në brigjet e Indisë jugore.