Komisioneri i BE-së për energjinë paralajmëron për verë të vështirë: Kriza mund të zgjasë me vite

Komisioneri Evropian për Energjinë dhe Strehimin, Dan Jorgensen, paralajmëroi se Evropa duhet të përgatitet për një verë të vështirë dhe një presion të zgjatur energjitik, duke thënë se çmimet mund të mbeten të larta për vite me radhë edhe nëse lufta me Iranin përfundon menjëherë.

“Në rastet më të mira, duhet të përgatitemi për një verë mjaft të vështirë”, tha Jorgensen në një intervistë me të përditshmen spanjolle La Vanguardia të botuar të martën.

Ai e përshkroi situatën energjetike si “shumë serioze”, duke paralajmëruar se ka të ngjarë të përkeqësohet për shkak të ndërprerjeve në tregjet globale të energjisë të shkaktuara nga konflikti.

“Edhe nëse paqja shpallet nesër, ne po përballemi me javë, muaj dhe madje vite vështirësish kur bëhet fjalë për çmimet e energjisë”, tha ai.

Jorgensen vuri në dukje dëmtimin e infrastrukturës së gazit natyror në rajon, veçanërisht në Katar, të cilës, sipas tij, mund t’i duhen vite për t’u rikuperuar plotësisht, duke i mbajtur çmimet të larta.

Tregjet e naftës mund të stabilizohen më shpejt, shtoi ai, por paralajmëroi se edhe ndërprerjet afatshkurtra mund të kenë pasoja të mëdha.

“Vetëm disa javë mund të jenë vendimtare nëse na mbaron karburanti për avionë ose nafta, ose nëse përballemi me probleme furnizimi”, tha ai.

Ai paralajmëroi gjithashtu për ndikime të menjëhershme tek konsumatorët, veçanërisht në aviacion.

“Fluturimet do të bëhen më të shtrenjta dhe, në disa raste, madje mund të shohim anulime”, tha ai.

Jorgensen tha se kriza duhet të shërbejë si një “thirrje zgjimi” për Evropën që të përshpejtojë kalimin e saj drejt energjisë së rinovueshme.

“Ndërsa importojmë më shumë se 370 miliardë euro (rreth 435 miliardë dollarë) lëndë djegëse fosile çdo vit, ne mbetemi shumë të prekshëm”, tha ai, duke shtuar se blloku ka paguar tashmë më shumë se 20 miliardë euro shtesë për energji që nga fillimi i luftës në Iran.

Ai gjithashtu përjashtoi një kthim në importet e energjisë ruse, edhe nëse lufta në Ukrainë mbaron.

Lidhur me masat afatshkurtra, Jorgensen tha se Komisioni Evropian do të propozonte një sërë opsionesh për të ulur kërkesën, duke ua lënë zbatimin shteteve anëtare.

“Në një situatë mungesëje, qëllimi duhet të jetë ulja e konsumit, jo rritja e tij”, tha ai, duke shpjeguar pse Brukseli ka dekurajuar masa të tilla si ulja e taksave të karburantit, të cilat disa shtete të BE-së i kanë zbatuar pavarësisht kësaj.

Rruga Press