“Përmirësimi i arsenalit tonë bërthamor është thelbësor” – Macron: Do rrisim numrin e kokave bërthamore
Presidenti francez, Emmanuel Macron njoftoi të hënën se Franca do të rrisë numrin e kokave bërthamore nga niveli aktual nën 300, por nuk dha një shifër. Do të jetë hera e parë që Franca rrit arsenalin e saj bërthamor që nga viti 1992.
“Me shumë seriozitet, vij sot për t’i njoftuar kombit një zhvillim të denjë për sfidat tona kombëtare dhe evropiane. Kam urdhëruar një rritje të numrit të kokave bërthamore në arsenalin tonë”, tha Macron në një bazë ushtarake në L’Ile Longue, ku ndodhen nëndetëset me raketa balistike të vendit.
“Ne nuk do të publikojmë më të dhëna mbi arsenalin tonë bërthamor, ndryshe nga e kaluara. Përmirësimi i arsenalit tonë bërthamor është thelbësor.”, shtoi ai.
Sipas presidentit francez, tetë vende evropiane janë të interesuara të bashkëpunojnë me vendin e tij në fushën e parandalimit bërthamor, duke iu referuar me emër Gjermanisë, Holandës dhe Polonisë, ndërsa sipas burimeve nga Elizeja, këto vende përfshijnë edhe Belgjikën, Greqinë dhe Suedinë, të cilat mund të “marrin pjesë në ushtrime” të parandalimit bërthamor francez.
Macron njoftoi gjithashtu se “nëndetësja e ardhshme me raketa balistike bërthamore, e cila do të mbajë flamurin francez, do të quhet “E Pamposhtura” dhe do të vihet në funksionim në vitin 2036”.
Presidenti francez vlerësoi se Franca duhet të “forcojë frenimin e saj bërthamor kundër kombinimit të kërcënimeve”.
“Dhe ne duhet të mendojmë për strategjinë e frenimit thellë brenda kontinentit evropian, me respekt absolut për sovranitetin tonë kombëtar. Me zbatimin progresiv të asaj që unë do ta quaja frenim të avancuar”, vazhdoi ai.
“Aktualisht po përjetojmë, në nivelin gjeopolitik, një periudhë përçarjeje plot rreziqe”, shtoi Macron, duke nënvizuar se “kjo periudhë justifikon një shtrëngim” të modelit francez të frenimit.
“Cili është çmimi i mbështetjes së gjerë të Koresë së Veriut për luftën agresive të Rusisë? Cilat janë pasojat e marrëveshjes së aleancës midis dy vendeve? Po varësia ekstreme që Rusia ka hyrë nga Kina? Duhet t’i marrim të gjitha këto parasysh”, tha Emmanuel Macron gjatë fjalimit të tij.
Më shumë se katër vjet pas fillimit të pushtimit rus të Ukrainës dhe dy ditë pas fillimit të ndërhyrjes së SHBA-së dhe Izraelit në Iran, presidenti francez vlerësoi se “po shohim si një rritje të rrezikut të konflikteve që kalojnë pragun bërthamor, ashtu edhe, në të njëjtën kohë, një rritje të konfliktit”.
Rruga Press